Հայաստանում գործող հեռուստաընկերությունները կկարողանան ինքնուրույն ընտրել, թե որ ընկերությունը պետք է չափի իր վարկանիշը։ Ազգային ժողովը երկրորդ ընթերցմամբ և ամբողջությամբ ընդունեց «Տեսալսողական մեդիայի մասին» օրենքում համապատասխան փոփոխությունների նախագիծը։
Նախագծի հեղինակ, ԱԺ գիտության, կրթության, մշակույթի և սպորտի հարցերի հանձնաժողովի նախագահ Սիսակ Գաբրիելյանը երեկ նախագիծը ներկայացնելիս նշեց, որ տարիներ շարունակ հեռուստաալիքների համար վարկանիշներ է կազմել ընդամենը մեկ ընկերություն՝ «Admosphere Armenia»–ն: Նրա խոսքով` վարկանիշը կազմվել է լսարանի գնահատականների և այլ չափանիշների հիման վրա, սակայն մինչև վերջ թափանցիկ չի եղել։ Այդ պատճառով ընկերության սեփականատերերը, կատարելով քաղաքական պատվեր, կարող էին բարձրացնել կամ իջեցնել այդ վարկանիշները՝ կախված հեռուստաալիքների քաղաքական ուղղվածությունից։ Ըստ Գաբրիելյանի` դա ուղղակիորեն ազդել է հեռուստաալիքների բյուջեի վրա։
Այժմ հեռուստաալիքները կկարողանան ընտրել,թե որ ընկերությունը պետք է չափի իրենց վարկանիշը։ Հեռուստաալիքների կեսից ավելին պետք է միանան և ընտրեն 1 ընկերություն։
Նախագիծն ընդունվեց 63 կողմ, 0 դեմ, 27 ձեռնպահ ձայներով: Ընդդիմադիր երկու խմբակցությունները ձեռնպահ քվեարկեցին։
