Թուրքիայում քրդերի մեծամասնությունը գոհ չէ մայիսյան ընտրությունների արդյունքներից. հարցում տեղական ընտրություններին ընդառաջ

Ստամբուլում գործող հետազոտական Spectrum House կենտրոնի կողմից վերջերս կատարված ուսումնասիրությունը ցույց է տվել, որ քուրդ ընտրողների գրեթե 58 տոկոսը գոհ չէ մայիսի 2023-ի նախագահական և խորհրդարանական ընտրությունների արդյունքներից, գրում է Turkish Minute-ը։

Նշենք, որ ընտրությունները հանգեցրին նախագահ Ռեջեփ Թայիփ Էրդողանի հաղթանակին ձայների 52,18 տոկոսով, իսկ նրա գլխավորած իշխող «Արդարություն և զարգացում» կուսակցությունը (ԱԶԿ) ստացավ խորհրդարանում տեղերի մեծամասնությունը:

Spectrum House-ը հետազոտություն է անցկացրել՝ ուսումնասիրելու քրդական քվեարկության փոփոխությունների և տեղական ընտրությունների միտումների միջև, որոնք նախատեսված են 2024 թվականի մարտին։ Հարցումն անցկացվել է Թուրքիայի  արևելյան և հարավ-արևելյան 15 շրջաններում։

Հարցին՝ գո՞հ են, արդյոք, մայիսյան ընտրությունների արդյունքներից, հարցվածների 22,6 տոկոսը պատասխանել է, որ բավարարված է, իսկ 57,8 տոկոսն էլ ասել է, որ դրանք չեն բավարարել իրենց սպասելիքները:

Հարցումը նաև բացահայտել է, որ երիտասարդ ընտրողները զգալիորեն տարբերվում են մյուս տարիքային խմբերից, քանի որ նրանք դժգոհություն են հայտնել մայիսյան ընտրությունների արդյունքներից․ այս միտումը ցածր է միջին և ավելի ավագ տարիքային խմբերի պարագայում։

Մայիսի 14-ին ընդհանուր ընտրություններում հարցման մասնակիցների 51 տոկոսը կողմ է քվեարկել քրդամետ Կանաչ ձախ կուսակցությանը, իսկ 21,8 տոկոսը կողմ է քվեարկել իշխող ԱԶԿ-ի օգտին, 14,1 տոկոսը՝ հիմնական ընդդիմադիր Ժողովրդահանրապետական կուսակցությանը (CHP):

Հետազոտության համաձայն՝ մասնակիցների 68,5 տոկոսը 2023 թվականի նախագահական ընտրություններում նախընտրել է CHP-ի առաջնորդ Քեմալ Քըլըչդարօղլուին, իսկ 23,2 տոկոսն ընտրել է Էրդողանին:

Էմմա Չոբանյան