13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Ամրամ Մակինյանը ՔՊ-ական համայնքապետի գրառման մասով հանցագործության մասին հաղորդում է ներկայացրել
Քաղաքականություն
30.09.2023 | 19:59
Փաստաբան Ամրամ Մակինյանը ՀՀ գլխավոր դատախազություն հանցագործության մասին հաղորդում է ներկայացրել Արարատի մարզի Սուրենավան համայնքի ՔՊ-ական համայնքապետ Անի Վարդազարյանի՝ արցախցիների վերաբերյալ կատարած գրառման կապակցությամբ։
«Այն արցախցին, որը կմասնակցի ցույցերին, զրկել բոլոր տեսակի օգնություններից»,- գրել էր նա։
Ներկայացված հաղորդման մեջ փաստաբան Մակինյանը շեշտել է.
«Նկատի ունենալով, որ պաշտոնատար անձի կողմից կատարված հրապարակումը առերևույթ պարունակում է ՀՀ քրեական օրենսգրքի 203-րդ (Խտրականությունը` տարբերակված վերաբերմունքի դրսևորումը, որը ոտնահարում է անձի պատիվն ու արժանապատվությունը կամ իրավունքներն ու ազատությունները) և 236-րդ հոդվածներով (Հավաք անցկացնելուն կամ դրան մասնակցելուն խոչընդոտելը կամ հարկադրելը) նախատեսված հանցագործության հատկանիշներ` խնդրում եմ հանձնարարել նախաձեռնել քրեական վարույթ և ձեռնարկել օրենքով նախատեսված բոլոր միջոցառումները առերևույթ հանցագործությունները համակողմանի բացահայտելու համար»,- նշել է Մակինյանը։
Ավելի ուշ Անի Վարդազարյանը հեռացրել էր գրառումը՝ ներողություն խնդրելով.
«Ես ներողություն եմ խնդրում իմ արած հայտարարության համար, որով կարծիք է ստեղծվել, թե ես դեմ եմ արցախցուն օգնելուն, սակայն ասածս ենթադրում է հետևյալը. Ամենքս հիմա պատրաստ ենք միայն ու միայն աջակցելու, սակայն մեր աջակցությանը զուգահեռ՝ ձեր՝ հրապարակում հայտնվելը, խառնվելը ներքին ներքաղաքական գործերին, հարված է մեզ թիկունքից ու թշնամու հարվածին համարժեք։ Դեմ եմ այս ծանր իրավիճակում հրապարակում բողոքի ձայն բարձրացնելուն, այն բողոքին, որով ոչնչով մեկս մյուսիս չենք օգնում»,- գրել է Վարդազարյանը։
