05.01.2025 | 21:53
Մատուցվեց Սուրբ ծննդյան ճրագալույցի պատարագ․ ԼՈՒՍԱՆԿԱՐՆԵՐ
Թբիլիսիի գագաթնաժողովում ներկայացրել եմ հեղափոխությունը բարեփոխումների կայուն գործընթացի վերածելու մեր Կառավարության տեսլականը. Արտակ Զեյնալյան
Քաղաքականություն
19.07.2018 | 20:41
Հուլիսի 17-18-ը Թբիլիսիում մասնակցել եմ Բաց կառավարման գործընկերության 5-րդ համաշխարհային գագաթնաժողովին. ֆեյսբուքի իր էջում գրել է ՀՀ արդարադատության նախարար Արտակ Զեյնալյանը:
«Ելույթիս ընթացքում ներկայացրել եմ Հայաստանում այս տարվա ապրիլ մայիսին տեղի ունեցած թավշյա հեղափոխության արդյունքներով ձևավորված նոր կառավարության առաջնահերթությունները, կոռուպցիայի դեմ պայքարի և որոշումների կայացման գործընթացում քաղաքացիական հասարակության դերի բարձրացման ուղղությամբ նախատեսվող քայլերը, ինչպես նաև ՀՀ կառավարության ջանքերն ուղղված Արևելյան գործընկերության «20 արդյունք մինչև 2020-ը» փաստաթղթի արդյունավետ և լիարժեք կատարմանը: Գործընկերներիս ներկայացրել եմ նաև հեղափոխությունը բարեփոխումների կայուն գործընթացի վերածելու մեր Կառավարության տեսլականը:
Գագաթնաժողովի շրջանակում հանդիպել եմ Բաց կառավարման գործընկերության քարտուղարության ներկայացուցիչների, ԱՄՆ Միջազգային զարգացման գործակալության Եվրոպայի և Եվրասիայի բյուրոյի ղեկավարի օգնականի և այլ պաշտոնատար անձանց հետ:
Վրաստանի գործընկերոջս՝ Թեա Ցուլուկիանիի հետ հանդիպման ընթացքում քննարկել ենք արդարադատության ոլորտում համագործակցության ուղղություններն ու նախանշել դրանք խորացնելու լուրջ հանձնառությունն ու ներուժը:
Այցի ընթացքում մասնակցել եմ նաև Վրաստանի, Արգենտինայի, Ալբանիայի, Բոսնիայի և Հերցեգովինայի իր գործընկերների հետ «Stand Up For Justice» խորագրով քննարկմանը, որտեղ ներկայացվել են ՄԱԿ Կայուն զարգացման նպատակների իրագործման ազգային գործողությունների ծրագրերը:
