06.06.2026 | 14:11
Հայ շախմատիստների վերջնական արդյունքները կանանց ԵԱ-ում
Արցախից բռնի տեղահանվածներին կացարաններ են տրամադրվում Սյունիքում, Գորիսում, Վայոց ձորում
Հասարակություն
25.09.2023 | 14:51
Արցախից ՀՀ բռնի տեղահանված քաղաքացիները, որոնք ունեն կացարանի կարիք, տեղավորվում են հիմնականում Սյունիքում, Գորիսում, Վայոց ձորում։ Տարածքային կառավարման և ենթակառուցվածքների նախարարությունից Factor․am-ին հայտնեցին, որ այդ նպատակով առանձնացվել են հյուրանոցներ, հյուրատներ, մասամբ բնակարանային ֆոնդ, որ ենթակա է բնակության։
Բռնի տեղահանվածները հաշվառվում են Կոռնիձորում տեղակայված Հումանիտար կայանում, իրականացվում է նրանց առաջնային կարիքի գույքագրում՝ սննդի, հագուստի հետ կապված, կացարանի, ընտանիքում հաշմանդամություն ունեցող անձի առկայություն և այլն։ Աշխատանքի և սոցիալական հարցերի նախարարությունից մեզ տեղեկացրին, որ ստեղծվել է նաև Առաջնային կարիքի հաշվառման հարթակ՝ https://e-soc.am, նաև գործում է ՀՀ աշխատանքի, սոցիալական հարցերի նախարարության 114 թեժ գիծը։ Հարթակի միջոցով իրենք ինքնուրույն կարող են լրացնել իրենց տվյալները, որոնք հասանելի են դառնում սոցիալական աշխատողների համար։
Բռնի տեղահանվածների առաջնային կարիքները հոգալու հարցով զբաղվում է ԼՂ-ում հումանիտար ճգնաժամի կառավարման խումբը՝ փոխվաչապետ Տիգրան Խաչատրյանի ղեկավարությամբ։ Խմբում ներագրավվել են ՀՀ աշխատանքի և սոցիալական հարցերի, Տարածքային կառավարման և ենթակառուցվածքների նախարարությունները, Միգրացիայի և քաղաքացիության ծառայությունը և այլ պետական կառույցներ։
Նշենք, որ սեպտեմբերի 25-ին ժամը 12:00 դրությամբ ԼՂ-ից Հայաստան մուտք է գործել բռնի տեղահանված 4850 անձ:
