02.11.2024 | 16:34
Երևանի 2 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Սենատում Արցախի վերաբերյալ ԱՄՆ պետքարտուղարի տեղակալի հայտարարությունները պաշտոնական Բաքվի դժգոհությունն են հարուցել
Քաղաքականություն
15.09.2023 | 18:09
Պաշտոնական Բաքուն դժգոհություն է հայտնել նախօրեին ԱՄՆ Սենատի արտաքին հարաբերությունների հանձնաժողովի կողմից Արցախում ստեղծված ճգնաժամի վերաբերյալ լսումների հետ կապված։ Մասնավորապես, Ադրբեջանի ԱԳՆ խոսնակ Այխան Հաջիզադեն նախ բողոքել է հանձնաժողովի նախագահ, սենատոր Բոբ Մենենդեսից՝ նրան մեղադրելով «Ադրբեջանի նկատմամբ թշնամական դիրքորոշման և կոռուպցիայի մեջ»։
Այնուհետև Հաջիզադեն դժգոհություն է հայտնել ԱՄՆ պետքարտուղարի Եվրոպայի ու Եվրասիայի հարցերով տեղակալի պաշտոնակատար Յուրի Քիմի հայտարարություններից՝ նշելով, թե դրանք, իբր, «չեն արտացոլում տարածաշրջանում իրողությունները»։
«Այդ գաղափարները, զուգահեռ նրան, որ հակասում են Աղդամի և Լաչինի ճանապարհների միաժամանակյա օգտագործման համաձայնությանը, որը ձեռք է բերվել սեպտեմբերին 1-ին Ադրբեջանի նախագահ Իլհամ Ալիևի և ԱՄՆ պետքարտուղար Էնթոնի Բլինքենի միջև շփումների ընթացքում, պարունակում են Հայաստանի կողմից ամբողջ աշխարհում Ադրբեջանի դեմ զրպարտչական արշավի տարրեր։ Ամերիկյան կողմը քաջ գիտակցում է, որ այդ համաձայնությունը, որը պետք է իրականացվեր նաև ԱՄՆ-ի միջնորդությամբ, խախտվել է Հայաստանի և նրա ստեղծած ֆիկտիվ ռեժիմի կողմից։ Շրջափակման և հումանիտար իրավիճակի մեղադրանքներն անհիմն են»,- ասել է Ադրբեջանի ԱԳՆ խոսնակը։
Բաքվին դուր չի եկել նաև այն, որ Պետքարտուղարության պաշտոնյան օգտագործել է «Լեռնային Ղարաբաղի հայ ժողովուրդ» արտահայությունը, ինչը, իբր, անհարգալից վերաբերմունք է ադրբեջանցիների իրավունքների նկատմամբ։
«Ամերիկյան կողմի օրինակով՝ խորհուրդ ենք տալիս միջազգային հանրությանը մաս չկազմել տարածաշրջանի ապակայունացմանը նպաստող նման քայլերին և չտրվել Հայաստանի զրպարտչական արշավին»,- ասվում է հայտարարության մեջ։
Հիշեցնենք, որ նախօրեին Սենատի լսումների ժամանակ ունեցած ելույթում Յուրի Քիմը կրկին կոչ էր արել Ադրբեջանի բացել Լաչինի միջանցքը։ Նա նշել էր, որ ԼՂ-ում հայերին իրավունքներն ու անվտանգությունը պետք է պաշտպանվեն, և որ Միացյալ Նահանգները թույլ չի տա էթնիկ զտում։
Էմմա Չոբանյան
