30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Ադրբեջանում քաղբանտարկյալների հարցը քննարկվել է ՄԱԿ-ի մարդու իրավունքների խորհրդում
Քաղաքականություն
14.09.2023 | 17:42
Ադրբեջանի իշխանությունները պետք է ազատ արձակեն Գուբադ Իբադօղլուին, Բախտիյար Հաջիևին և մյուս քաղբանտարկյալներին ու դադարեցնեն բռնաճնշումները երկրի քաղաքացիական հասարակության նկատմամբ։ Նախօրեին Ժնևում ՄԱԿ-ի Մարդու իրավունքների խորհրդի 54-րդ նստաշրջանում նման կոչով է հանդես եկել ադրբեջանցի իրավապաշտպան, Լրագրողների ազատության և անվտանգության ինստիտուտի (IRFS) տնօրեն Էմին Հուսեյնովը, գրում են տեղական լրատվամիջոցները։
Նա ողջունել է ՄԱԿ-ի Մարդու իրավունքների գերագույն հանձնակատարի գործունեությունը՝ նշելով նաև նրա հայտարարությունը Ադրբեջանում ձերբակալված ընդդիմադիր քաղաքական գործիչ և տնտեսագետ Գուբադ Իբադօղլուի գործի վերաբերյալ։ Հուսեյնովը, միաժամանակ, մտահոգություն է հայտնել նաև սեպտեմբերի 13-ին ՄԱԿ-ի Մարդու իրավունքների խորհրդի նիստում Ադրբեջանի արտգործնախարար Ջեյհուն Բայրամովի հայտարարության կապակցությամբ, որը քննադատել է ՄԱԿ-ի հատուկ զեկուցողների գործունեությունը՝ ադրբեջանական կառավարության կարծիքները հաշվի չառնելու համար։
Հուսեյնովը հիշեցրել է, որ հատուկ զեկուցողների անաչառությունը հենց նրանում է, որ նրանք պարտավոր չեն հաշվի առնել պետությունների դիրքորոշումները, երբ խոսքը վերաբերում է մարդու իրավունքների միջազգային չափանիշներին։
Նա նաև կոչ է արել Ադրբեջանի իշխանություններին՝ հարգել քաղաքացիների ազատությունները, ապահովել հաշվետվողականություն և թափանցիկություն, դադարեցնել քաղաքացիական հասարակության ճնշումները և ազատ արձակել բոլոր քաղբանտարկյալներին։
Էմմա Չոբանյան
