20.06.2026 | 14:53
Ձորագետում հայտնաբերված վիրավոր արծվին տեղափոխվել է հատուկ կենտրոն
Զախարովան հայտարարել է, որ Մոսկվան Բաքվին դիվանագիտական դեմարշ է ներկայացրել
Քաղաքականություն
13.09.2023 | 14:15
Ռուսաստանը դիվանագիտական դեմարշ է հայտարարել Ադրբեջանին՝ «ռուսական նոր շրջաններում» ընտրությունների վերաբերյալ Բաքվի ԱԳՆ հայտարարության հետ կապված, քանի որ դա չի համապատասխանում երկրների միջև հարաբերությունների դաշնակցային բնույթին։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, փոխանցում է ՏԱՍՍ-ը։
«Մենք չենք կարող ընդունել նման գնահատականները, դրանք անընդունելի գնահատականներ են և չեն համապատասխանում մեր երկրների հարաբերությունների դաշնակցային մակարդակին։ Դրա համար դիվանագիտական մակարդակով ադրբեջանական կողմին դեմարշ է հայտարարվել։ Մենք այդ առումով ամեն ինչ հայտնել ենք»,- ասել է Զախարովան ճեպազրույցում։
«Մենք ելնում ենք նրանից, որ Բաքուն մեր երկրի տարածքային ամբողջականությանը պետք է վերաբերվի նույն հարգանքով, ինչ մեզանից ակնկալում են մեր գործընկերները, երբ խոսքը վերաբերում է Ադրբեջանի Հանրապետության տարածքային ամբողջականությանը։ Կարծում եմ, որ մեր նոր շրջանների պատմությունը մեր ադրբեջանցի ընկերները լավ գիտեն»,- հավելել է նա։
Հիշեցնենք, որ ավելի վաղ պաշտոնական Բաքուն հայտարարել է, որ չի ճանաչում ՌԴ «նոր շրջաններում տեղի ունեցած ընտրությունների արդյունքները»։ Խոսքն Ուկրաինայի գրավյալ տարածքների մասին է։
Էմմա Չոբանյան
