Քաղաքականություն
05.09.2023 | 17:03
Հայաստանը Ուկրաինա հումանիտար օգնություն կուղարկի։ Այս տեղեկությունը հայտնում են Factor.am-ի աղբյուրները։ Հայաստանի արտաքին գործերի նախարարությունն այս տեղեկությունն առայժմ չի մեկնաբանում։
Կիևի հայերի միության նախագահ Նորիկ Գևորգյանը Factor.am-ի հետ զրույցում անուղակի հաստատեց այս տեղեկությունը, երբ հետաքրքրվեցինք, թե արդյո՞ք Հայաստանից ուղարկված օգնությունն արդեն հասել է Ուկրաինա։
«Դեռ չի հասել։ Ամսի 8-ին դեսպանի հետ հանդիպում կա, այդ ժամանակ ավելի ստույգ կլինի, բայց էս ամսվա մեջ պետք է, որ լրիվ հասնի»,-ասաց Նորիկ Գևորգյանը։
Factor.am-ի ճշտող հարցին՝ այս օգնությունը միայն հայ համայնքի համա՞ր է, թե՞ նաև ուկրաինացի ժողովրդի, Նորիկ Գևորգյանը նշեց․ «Ուկրաինացի ժողորդին, որի մեջ հայ համայնքն էլ է մտնում։ Չենք կարող ասել, որ սա առանձին հայ համայնքինն է, այստեղ պատերազմ է, այստեղ բոլորս մեր ունեցածով կիսվում ենք»։ Առայժմ տեղեկություններ չկան ուղարկվող բեռների ծավալի և պարունակության վերաբերյալ։
Նարեկ Կիրակոսյան
