14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Կիևը գարնանից ի վեր ամենահզոր հրթիռակոծությանն է ենթարկվել
Քաղաքականություն
30.08.2023 | 16:53
Կիևում ռուսական հրթիռային հարձակման հետևանքով երկու մարդ է զոհվել, ևս երկուսը՝ վիրավորվել։ Այս մասին հայտնել է Կիևի քաղաքային ռազմական վարչակազմի ղեկավար Սերգեյ Պոպկոն։
Նրա խոսքով՝ սա քաղաքի ամենազանգվածային գնդակոծությունն է գարնանից ի վեր։ Ռուսական բանակը նախ տարբեր ուղղություններից կիրառել է «Շահեդ» հարվածային անօդաչու թռչող սարքեր, ապա՝ հրթիռներ։ ՀՕՊ ուժերը ոչնչացրել են ավելի քան 20 օդային թիրախ, ասել է Պոպկոն։
Կիևի քաղաքապետ Վիտալի Կլիչկոն, իր հերթին, հայտնել է, որ զոհեր և վիրավորներ են գրանցվել քաղաքի Շևչենկովսկի շրջանում․ բեկորներն ընկել են վարչական շենքի վրա։ Վիրավորները հոսպիտալացվել են։ Ավելի ուշ Կիևի քաղաքային ռազմական վարչությունը պարզաբանել է, որ զոհվել է երկու պահակ, գրում է BBC-ի ռուսական ծառայությունը։
ՌԴ արձակած հրթիռի բեկորներ են ընկել Զդոլբունովսկայա փողոցում գտնվող Աուչան առևտրի կենտրոնի շենքի վրա, հայտնել է Դառնիցայի շրջանային պետական վարչակազմի նախագահի պաշտոնակատար Նիկոլայ Կալաշնիկը։ Բեկորների ընկնելու հետևանքով առաջացած հրդեհը մարվել է, իսկ շենքի տանիքը քանդվել է։ Ըստ նախնական տեղեկությունների՝ ոչ ոք չի տուժել։
Կիևի մարզում էլ վեց առանձնատուն է վնասվել, հայտնել են ոստիկանությունից։
