17.12.2025 | 22:03
Երևանում Opel մակնիշի ավտոմեքենա է այրվել
Պետերբուրգում տեղի է ունեցել Պրիգոժինի հուղարկավորությունը
Քաղաքականություն
30.08.2023 | 14:02
Սանկտ Պետերբուրգում տեղի է ունեցել «Վագներ» մասնավոր ռազմական ընկերության ղեկավար Եվգենի Պրիգոժինի վերջին հրաժեշտի փակ արարողությունը, որը մահացել է օգոստոսի 23-ին ավիավթարից։ Այս մասին հայտնել է Պրիգոժինի մամուլի ծառայությունը Տելեգրամ-ալիքում, գրում է Meduza-ն։
Պրիգոժինը հուղարկավորվել է Պորոխովսկոյե գերեզմանատանը։ Մամուլի ծառայությունից նաև հայտնել են, որ հուղարկավորությունը տեղի է ունեցել միայն հարազատների և ամենամոտ ընկերներների մասնակցությամբ, ինչպես «ցանկացել են Պրիգոժինի հարազատները»։
Համացանցում նաև տարածվել են Պրիգոժինի գերեզմանի լուսանկարները։
Ըստ «Դոժդ»-ի՝ Պրիգոժինին հուղարկավորել են հոր կողքին։ «Շքեղ հուղարկավորություն», ըստ հեռուստաալիքի, չի կազմակերպվել, գերեզմանատանը կրակոցներ չեն հնչել։ Ռազմական պատիվները, որոնք շնորհվում են Ռուսաստանի հերոսին, Պրիգոժինին չեն մատուցվել։ Գերեզմանատան աշխատակիցը պատմել է, որ Պրիգոժինի հուղարկավորությանը մասնակցել է 20-ից 30 մարդ։ Նա ասել է, որ արարողությանը զինվորական համազգեստով մարդկանց չի տեսել, իսկ հրաժեշտի արարողությունը տևել է 40 րոպե։
«Ֆոնտանկա»-ի փոխանցմամբ էլ՝ Պրիգոժինի հուղարկավորության մասին հաղորդումներից հետո գերեզմանատանը հայտնվել են Ազգային գվարդիայի աշխատակիցներն ու շրջափակել տարածքը:
Հիշեցնենք, որ օգոստոսի 23-ին Տվերի մարզում վթարի էր ենթարկվել Եվգենի Պրիգոժինին պատկանող մասնավոր օդանավը։ Վթարի հետևանքով զոհվել է 10 մարդ՝ 7 ուղևոր և անձնակազմի 3 անդամ:
Էմմա Չոբանյան
