25.11.2024 | 23:30
Էրդողանը ծրագրում է հաջորդ ժամկետով գրավել իշխանությունը․ TIME-ի անդրադարձը
Էրդողանի կուսակցությունը հաստատում է․ Թուրքիայի նախագահը կմեկնի Սոչի՝ Պուտինի հետ բանակցությունների
Քաղաքականություն
29.08.2023 | 13:20
Ռուսաստանի և Թուրքիայի նախագահների այդքան սպասված հանդիպումը տեղի է ունենալու ՌԴ տարածքում։ Մասնավորապես, Թուրքիայի նախագահ Ռեջեփ Թայիփ Էրդողանի ղեկավարած «Արդարություն և զարգացում» կուսակցության խոսնակ Օմեր Չելիքը հայտարարել է առաջիկայում Սոչի կատարելիք այցի մասին և հույս հայտնել, որ այցը դրական զարգացումներ կբերի Սևծովյան հացահատիկային գործարքի հետ կապված, գրում են թուրքական լրատվամիջոցները։
«Առաջիկա օրերին նա կայցելի Սոչի։ Մենք կարծում ենք, որ այս այցից հետո նոր զարգացումներ կլինեն»,- լրագրողներին ասել է Չելիքը՝ հավելելով, որ այցը կարող է հանգեցնել գործարքի վերականգնման ջանքերի նոր փուլի։
Չելիքն այցի ժամանակացույցի վերաբերյալ տեղեկություններ չի հայտնել։
Հիշեցնենք, որ նախօրեին էլ ՌԴ նախագահի մամուլի խոսնակ Դմիտրի Պեսկովն էր հաստատել երկու երկրների նախագահների հանդիպման մասին շրջանառվող լուրերը։
«Հանդիպումը տեղի կունենա շուտով։ Մենք ժամանակին այդ մասին կհայտնենք»,- ասել էր Պեսկովը՝ պատասխանելով հարցին՝ արդյո՞ք բանակցությունները կարող են տեղի ունենալ Ռուսաստանի տարածքում։
Պեսկովը հավելել էր, որ դեռ չի կարող լրացուցիչ մանրամասներ հայտնել։
Մամուլում տեղեկություններ են տարածվում, որ հանդիպումը տեղի է ունենալու սեպտեմբերի 4-ին։
Հավելենք, որ թուրքական կողմը երկար ժամանակ աշխատանք էր տանում Պուտինի՝ Թուրքիա այցի ուղղությամբ։ Էրդողանն իր հերթին մի քանի անգամ հայտարարել էր, որ Պուտինն օգոստոսին պատրաստվում է այցելել Թուրքիա, սակայն դա տեղի չունեցավ։
Էմմա Չոբանյան
