Բնակարանների գների աճով Թուրքիան աշխարհում առաջատարն է

Knight Frank անշարժ գույքի միջազգային խորհրդատվական ընկերության «Բնակարանների գների համաշխարհային ինդեքսը» ցույց է տալիս, որ բնակարանների գները Թուրքիայում 2023 թվականի առաջին եռամսյակում 2022 թվականի նույն ժամանակահատվածի համեմատ աճել են 132,8 տոկոսով։ Ընդհանրապես, Թուրքիան այս առումով աշխարհում առաջատարն է, գրում են թուրքական լրատվամիջոցները։

Վերլուծելով 56 երկրներ և շրջաններ՝ Անկարան, Իզմիրը և Ստամբուլը ցուցակի 150 բնակավայրերի մեջ բնակարանների գների ամենաբարձր աճ գրանցած նահանգներն են՝ համապատասխանաբար 135,3 , 133 և 127,3 տոկոսով:

Թուրքիային հաջորդում են Հյուսիսային Մակեդոնիան 18,8 տոկոս տարեկան ու 1,3 եռամսյակային աճով, Խորվաթիան՝ 17,3  և 4,7 տոկոսով, Հունգարիան՝ 16,6 և 2,2 տոկոսով, Լիտվան՝ 15,3 և 8,2 տոկոս, Հունաստանը՝ 14,5 և 4 տոկոս։

Նշվում է, որ որոշ եվրոպական երկրներում բնակարանների գները նվազել են։ Գերմանիայում բնակարանների գները նվազել են 1 տոկոսով, մինչդեռ Բրիտանիայում այդ ցուցանիշը կազմել է 3,1 տոկոս, իսկ Շվեդիայում՝ 8,8 տոկոս։

Ըստ Թուրքիայի պետական վիճակագրական ինստիտուտի (TÜİK) օգոստոսին ներկայացրած տվյալների՝ հուլիսին երկրում տարեկան գնաճը կազմել է 47,83 տոկոս մինչդեռ անկախ ENAG խումբը հայտնում է, որ այդ ցուցանիշը կազմել է 122 տոկոս:

Հավելենք, որ վերջին մի քանի տարիների ընթացքում վարձակալության գները ևս Թուրքիայում աննախադեպ բարձրացել են։ Փետրվարի 6-ի ավերիչ երկրաշարժերից հետո էլ  նոր արտագաղթը երկրի արևելյան շրջաններից առաջացրել է  գնաճի նոր ալիք:

Էմմա Չոբանյան