15.09.2026 | 23:00
Թրամփը հայտարարել է, որ TRIPP-ը մեծ առավելություն է տալիս Թեհրանի հետ հարաբերություններում․ The Hill
«Վագները» կդադարի գոյություն ունենալ․ ISW
Քաղաքականություն
25.08.2023 | 15:51
Պատերազմի ուսումնասիրության ամերիկյան ինստիտուտը (ISW) գրում է, որ ռուսական «Վագներ» մասնավոր ռազմականացված խմբավորման ղեկավար Եվգենի Պրիգոժինի և խմբավորման հրամանատար Դմիտրի Ուտկինի՝ ՌԴ նախագահ Վլադիմիր Պուտինի կողմից ենթադրյալ սպանությունից հետո, ամենայն հավանականությամբ, խմբավորումն այլևս չի լինի անկախ կառույց, փոխանցում է DW-ի ռուսական ծառայությունը։
Հայտնի չէ՝ արդյո՞ք Կրեմլը մտադիր է ամբողջությամբ ցրել «Վագները», թե՞ ցանկանում է դրանից փոքր կազմակերպություն ստեղծել՝ ամբողջովին ենթակա ՌԴ Պաշտպանության նախարարությանը։ «Վագներ»-ի վերականգնումը որպես գրեթե անկախ կազմակերպության՝ Կրեմլին հավատարիմ նոր հրամանատարի ներքո, հնարավոր է, բայց քիչ հավանական, կարծում են ISW-ի փորձագետները։
Ինստիտուտը հիշեցնում է, որ «Վագներ»-ի հրամանատարները պաշտոնական հայտարարություն չեն տարածել Պրիգոժինի ինքնաթիռի խոցումից հետո։ Խմբավորման հրամանատարների լռությունը կարող է պայմանավորված լինել Պրիգոժինի և Ուտկինի սպանությունից հետո «Վագներ»-ի շարքերում տիրող քաոսով և խառնաշփոթով կամ ռուսական իշխանությունների կողմից լռելու հստակ հրահանգներով:
ISW-ն ընդգծում է՝ «Վագներ»-ի ղեկավարության սպանությունը ցույց է տալիս, որ Կրեմլը թշնամաբար կվերաբերվի նրանց, ովքեր կփորձեն ապահովել իրենց զուգահեռ ռազմական կառույցների անկախությունը։
