14.09.2026 | 11:22
Սիսիանի «Մայիսի 28» զբոսայգու 10-րդ հողամասը վերադարձվել է համայնքին
Մոսկվայի դատարանը երկարացրել է WSJ-ի լրագրող Գերշկովիչի կալանքը
Քաղաքականություն
24.08.2023 | 15:17
Մոսկվայի Լեֆորտովոյի շրջանային դատարանը հետաքննության պահանջով երկարացրել է The Wall Street Journal-ի ամերիկյան պարբերականի մոսկովյան բյուրոյի թղթակից Էվան Գերշկովիչի կալանքը, որը մեղադրվում է լրտեսության մեջ, գրում է DW-ի ռուսական ծառայությունը։
«Գերշկովիչի առնչությամբ դատարանի որոշմամբ կալանքի ժամկետը երկարացվել է երեք ամսով, իսկ ընդհանուր առմամբ՝ մինչև ութ ամսով, այսինքն՝ մինչև 2023 թվականի նոյեմբերի 30-ը»,- «Ինտերֆաքս»-ին հայտնել են դատարանի մամուլի ծառայությունից։
Նիստն անցել է դռնփակ, քանի որ քրեական գործի նյութերը գաղտնի են։
Եկատերինբուրգում ԱՄՆ քաղաքացի 32-ամյա լրագրողի կալանավորման մասին մարտի 29-ին հայտնել էր ՌԴ ԱԴԾ հանրային կապերի կենտրոնը։ Հաջորդ օրը Լեֆորտովի շրջանային դատարանը նրան ձերբակալել էր մինչև մայիսի 29-ը՝ լրտեսության կասկածանքով։
Ռուսական հատուկ ծառայությունները վստահ են, որ լրագրողը, «գործելով ամերիկյան կողմի ցուցումով, պետական գաղտնիք կազմող տեղեկություններ էր հավաքում ռուսական ռազմարդյունաբերական համալիրի ձեռնարկություններից մեկի գործունեության մասին»։
Նա դարձել է առաջին օտարերկրյա թղթակիցը, որը նման մեղադրանքով ձերբակալվել է Ռուսաստանում 1986 թվականից ի վեր։ Bloomberg-ը, վկայակոչելով անանուն զրուցակիցներին, հայտնել է, որ ՌԴ նախագահ Վլադիմիր Պուտինն անձամբ է հավանություն տվել Գերշկովիչի ձերբակալությանը։ Գերշկովիչի պաշտպանական կողմը հայտարարել է, որ նա չի ընդունում մեղքը։
Իր հերթին, ԱՄՆ Պետքարտուղարությունը պաշտոնապես լրագրողին անվանել է «ապօրինաբար պահվող անձ», ինչը թույլ է տալիս Վաշինգտոնին օգտագործել լրացուցիչ մեխանիզմներ նրա ազատ արձակման համար, այդ թվում՝ փոխանակման շուրջ բանակցություններ վարել։
Մայիսի սկզբին CNN-ը, հղում անելով իր աղբյուրներին, հաղորդել էր, որ ԱՄՆ իշխանությունները փնտրում են պոտենցիալ թեկնածուների ամբողջ աշխարհում՝ Գերշկովիչին փոխանակելու համար։
