25.02.2026 | 23:29
Ինչպես են ադրբեջանցի գործարարները ՌԴ-ին օգնում շրջանցել պատժամիջոցները. FT-ի հետաքննությունը
Զելենսկին ԵՀ ղեկավարի հետ քննարկել է գյուղատնտեսական ապրանքների արտահանման հարցը
Քաղաքականություն
22.08.2023 | 15:32
Ուկրաինայի նախագահ Վլադիմիր Զելենսկին Աթենքում Ուկրաինա-Բալկաններ գագաթնաժողովի շրջանակում հանդիպել է Եվրահանձնաժողովի նախագահ Ուրսուլա ֆոն դեր Լեյենի հետ։ Այս մասին հայտնել է Ուկրաինայի ղեկավարի մամուլի ծառայությունը, գրում է Korrespondent-ը։
Քննարկման հիմնական հարցն ուկրաինական գյուղմթերքի արտահանումն ու տարանցումն է եղել։
«Կարևոր է վերականգնել Ուկրաինայի ու ԵՄ-ի միջև լիարժեք առանց մաքսատուրքի առևտուրը և ապահովել ուկրաինական գյուղատնտեսական ապրանքների արտահանման ազատ մուտքը ԵՄ միասնական շուկայի ամբողջ տարածք: Ես ակնկալում եմ, որ սեպտեմբերի 15-ին ուկրաինական գյուղատնտեսական արտադրանքի նկատմամբ ցանկացած սահմանափակում ԵՄ-ն կվերացնի»,- ասել է Զելենսկին։
Քննարկվել են նաև հացահատիկային միջանցքի այլընտրանքային ուղիները Ռուսաստանի կողմից Սևծովյան հացահատիկային նախաձեռնության արգելափակումից հետո: Առանձնահատուկ ուշադրություն է դարձվել անվտանգության և ֆինանսական ասպեկտներին, նավերի ապահովագրության խնդիրներին։
Վլադիմիր Զելենսկին և Ուրսուլա ֆոն դեր Լեյենը նաև գնահատել են Ուկրաինայի առաջընթացը Եվրահանձնաժողովի յոթ առաջարկությունների կատարման հարցում և այս ուղղությամբ հետագա քայլերը։
«Մենք նպատակաուղղված ենք առավելագույն արդյունքի հասնել Եվրահանձնաժողովի հանձնարարականների իրականացման առումով: Մենք ակնկալում ենք դրական գնահատական 2023 թվականին ԵՄ-ին Ուկրաինայի անդամակցության մեկնարկի վերաբերյալ՝ ԵՄ անդամ երկրների որոշման և հոկտեմբերին փաթեթի ընդլայնման շրջանակում»,- ասել է Ուկրաինայի նախագահը։
Բացի այդ, Զելենսկին և ֆոն դեր Լեյենը համաձայնեցրել են դիրքորոշումները Խաղաղության բանաձևի և Խաղաղության գլոբալ գագաթնաժողովի նախապատրաստման վերաբերյալ։
