14.09.2026 | 10:21
Ուկրաինական ԱԹՍ-ները հարձակվել են Կրասնոդարի երկրամասի վրա․ Սոչիում հինգ մարդ է վիրավորվել
Ադրբեջանի կեղծիքի արշավը չի կարող միջազգային հանրության ուշադրությունը շեղել Բաքվի էթնիկ զտումների քաղաքականությունից․ Մարուքյանը պատասխանել է Հաջիևին
Քաղաքականություն
15.08.2023 | 12:51
ՀՀ հատուկ հանձնարարություններով դեսպան Էդմոն Մարուքյանն X-ում անդրադարձել է Ադրբեջանի նախագահի օգնական Հիքմեթ Հաջիևի հրապարակմանը, թե Հայաստանը, իբր, շարունակում է «ականապատման տեռորը»։
«Մինչ օրս հայկական կողմերը ձեռնարկել են բոլոր անհրաժեշտ քայլերը վստահության ամրապնդման համատեքստում, այդ թվում՝ Ադրբեջանին հանձնելով ականների բոլոր քարտեզները, սակայն ի պատասխան՝ Ադրբեջանը շարունակում է կեղծ մեղադրանքներ հնչեցնել ականապատ դաշտերի շարունակական տեղադրման մասին և ի հակադրություն պայմանավորվածություններին՝ անգամ չի ազատել ռազմագերիներին և իր բանտերում գտնվող այլ մարդկանց՝ որպես վստահություն ձևավորելու միջոց: Ադրբեջանը պարբերաբար հարձակվում և գրավում է Հայաստանի ինքնիշխան տարածքի տարբեր հատվածներ, խախտում է նոյեմբերի 9-ի հիմնարար պարտավորությունները և լիակատար շրջափակման մեջ է պահում Լեռնային Ղարաբաղի ժողովրդին։ Հիքմեթ Հաջիևը լավ կաներ՝ դադարեցներ կեղծիքի այս արշավը, քանի որ դա ոչ մի կերպ չի կարող միջազգային հանրության ուշադրությունը շեղել Ադրբեջանի կողմից վարվող էթնիկ զտումների քաղաքականության թեմայից»,- գրել է Մարուքյանը։
