Պուտինն առաջարկել է ԵԽ-ին չծանուցել ՌԴ-ում ռազմական դրություն մտցնելու և այն վերացնելու մասին

ՌԴ նախագահ Վլադիմիր Պուտինը Պետդումա է ներկայացրել օրենքի նախագիծ, որը վերացնում է երկրում ռազմական կամ արտակարգ դրություն մտցնելու կամ դադարեցնելու մասին ԵԽ գլխավոր քարտուղարին ծանուցելու անհրաժեշտությունը։ Փաստաթուղթը հրապարակվել է Պետդումայի տվյալների բազայում, գրում է Meduza-ն։

Նշվում է, որ փոփոխությունները կատարվում են ռազմական և արտակարգ դրության դաշնային սահմանադրական օրենքներում։ Գործող նորմերի համաձայն՝ երկրում ռազմական դրություն կամ արտակարգ դրություն մտցնելիս Ռուսաստանը պետք է ծանուցի ՄԱԿ-ի և Եվրոպայի խորհրդի գլխավոր քարտուղարներին ռուսաստանցիների իրավունքների և ազատությունների սահմանափակման առումով միջազգային պայմանագրերով ստանձնած պարտավորություններից հետ կանգնելու մասով։ Սա պարտավորություն է, որը  համապատասխանում է Մարդու իրավունքների և հիմնարար ազատությունների պաշտպանության մասին կոնվենցիայի պահանջներին։

Պուտինն առաջարկում է օրենքից բացառել կոնվենցիայի հիշատակումը և ԵԽ գլխավոր քարտուղարին տեղեկացնելու մասին կետը։ Որպես պարզաբանում նշվում է, որ 2022 թվականի մարտի 16-ից այդ կոնվենցիան, ինչպես նաև Ռուսաստանի կողմից վավերացված կից արձանագրությունները դադարել են գործել ՌԴ-ի նկատմամբ։

Հիշեցնենք, որ 2022 թվականի փետրվարին Եվրոպայի խորհուրդը դատապարտել էր Ուկրաինա Ռուսաստանի նեխուժումը։ ԵԽ Նախարարների կոմիտեն կասեցրել էր Ռուսաստանի ներկայացուցչությունը կազմակերպությունում։ Ի պատասխան՝ ՌԴ-ն դուրս է եկել Եվրոպայի խորհրդից։

Էմմա Չոբանյան