16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Նիգերում պուտչիստները փակել են երկրի օդային տարածքը
Քաղաքականություն
07.08.2023 | 13:27
Նիգերում իշխանությունը զավթած պուտչիստները հայտարարել են երկրի օդային տարածքը փակելու մասին՝ ռազմական միջամտության ռիսկերի պատճառով։ Թռիչքի արգելքը վերաբերում է բոլոր օդանավերին և ուժի մեջ կմնա «մինչև հետագա ծանուցումը»։ Այս մասին օգոստոսի 6-ի երեկոյան ազգային հեռուստատեսության եթերում ասել է ռազմական խունտայի խոսնակը, գրում է DW-ի ռուսական ծառայությունը:
Նրա խոսքով՝ այս քայլի պատճառը հարևան երկրների միջամտության՝ գնալով ավելի ակնհայտ սպառնալիքներն են։ Նիգերի օդային տարածքը խախտելու ցանկացած փորձ կստանա «ուժեղ և անհապաղ պատասխան», ասվում է հայտարարության մեջ։
Ավելի վաղ հազարավոր ցուցարարներ հավաքվել էին Նիգերի մայրաքաղաք Նիամեյի մարզադաշտում՝ ցույց տալու իրենց աջակցությունը իշխանության եկած զինվորականներին:
Հանգստյան օրերին ավարտվել է Արևմտյան Աֆրիկայի տնտեսական համայնքի (ECOWAS) պետությունների կողմից Նիգերի խունտային տրված վերջնագրի ժամկետը։ Այս երկրները պահանջում էին Նիգերի ապստամբներից մինչև օգոստոսի 6-ը վերականգնել սահմանադրական կարգը և իշխանության վերադարձնել պաշտոնանկ արված նախագահ Մուհամեդ Բազումին։
ECOWAS-ը պուտչիստներին սպառնացել է ամենակոշտ միջոցներով, այդ թվում՝ ռազմական ներխուժմամբ, սակայն կազմակերպության անդամները չեն կարողանում պայմանավորվել Նիգերում ռազմական գործողության շուրջ։
