Հորդորում եմ ՀՀ իշխանություններին զերծ մնալ քայլերից, որոնք կասկածի տակ կդնեն Արցախի ինքնորոշումը․ ԱՀ նախագահ

«Հայաստանի իշխանությունների հետ ունենք շատ ակտիվ շփումներ, պարբերաբար, եթե ոչ ամեն օր, շփվում ենք, խոսում ենք պրոբլեմների մասին, լինում են տարաձայնություններ և ամենակարևոր տարաձայնությունը միշտ ղարաբաղյան խնդրի հետ է կապված
Ես ուզում եմ հորդորել Հայաստանի իշխանություններին զերծ մնալ այն քայլերից, հայտարարություններից, որոնք կարող են կասկածի տակ դնել Արցախի ինքնորոշումը»,- Արցախի Հանրապետության նախագահ Արայիկ Հարությունյանն Արցախի հանրային հեռուստաընկերությանը տված հարցազրույցում անդրադառնալով Հայաստան-Արցախ հարաբերություններին։

«Շարժումը սկսվել է 1988 թվականին ոչ թե մարդու, ոչ թե ղեկավարի կամ իշխանության, այլ ժողովրդի կողմից, այն արտացոլվել է հանրաքվեներով, տարբեր հայտարարություններով և այն որևէ մեկ մարդու մենաշնորհը չէ: Ուզում եմ հորդորել Հայաստանի իշխանություններին Լեռնային Ղարաբաղի հարցով լինել շատ զգույշ։ Ոչ ոք իրավունք չունի կասկածի տակ դնելու և սահմանափակելու մեր ինքնորոշման իրավունքը: Դա բացառիկ իրավունք է, որը չի տրվել իշխանությունների կողմից, այլ միջազգայնորեն ճանաչված է և այդ իրավունքի առումով պատրաստակամություն է հայտնել պայքարելու Արցախի ժողովուրդը, և որին սատար է կանգնում հայ ժողովուրդը»։

Հարությունյանի խոսքով՝ հայ ժողովուրդն այդ պատրաստակամությունը հայտնել է՝ հասկանալով, որ ունենալու է պատերազմներ, զրկանքներ․ «Այսօր էլ Արցախի ժողովուրդը կրում է զրկանքներ՝ գիտակցելով մի բան, որ սա իր իրավունքի համար պայքարն է, որը սկսել է 1988 թվականին: Մենք պետք է գիտակցենք, որ կլինեն տարաձայնություններ, բայց համոզված եմ, որ ամեն ինչ հարթվելու է, ամեն ինչ չէ կորցված»։

Թե պաշարված Արցախն ինչ է ակնկալում հայությունից, Հարությունյանը նշել է՝ առաջին հերթին բարոյական աջակցություն, քանի որ Արցախում այս պայքարը պայքար է բոլորի համար, բոլորի փոխարեն, նպատակն է՝ փրկել Արցախը, այն պահել հայկական․ «Ցույցեր անել, կոչեր և այլն։ Ամենակարևորը՝ նաև նյութական աջակցություն ենք ակնկալում, քանի որ այսօր Արցախում զբաղվում են միայն հողագործությամբ»:

Մանրամասները՝ տեսանյութում։