16.12.2025 | 16:45
Պարույր Սևակի արձանը կհեռացվի Զանգակատան միջնակարգ դպրոցի բակից
Ալիևը բանակցություններ է անցկացրել իտալական պաշտպանական ընկերության ղեկավարի հետ, որից Բաքուն ռազմական ինքնաթիռներ է գնել
Քաղաքականություն
04.08.2023 | 17:15
Ադրբեջանի նախագահ Իլհամ Ալիևը նախօրեին ընդունել է իտալական հայտնի «Լեոնարդո» պաշտպանական արդյունաբերական ընկերության տնօրենների խորհրդի նախագահ Ստեֆանո Պոնտեկորվոյին։ Ադրբեջանական կողմի հաղորդմամբ՝ հանդիպմանը նշվել է տարբեր ոլորտներում Ադրբեջանի և Իտալիայի միջև արդյունավետ գործընկերության վրա հիմնված երկկողմ հարաբերությունների հաջող զարգացումը, քննարկվել են «Լեոնարդո»-ի հետ համագործակցության հարցեր։
Հավելենք, որ «Լեոնարդո»-ն իտալական պաշտպանական խոշորագույն ընկերություն է, որ հետաքրքիր տեխնոլոգիաներ ունի քաղաքացիական ոլորտի համար, ներառյալ՝ «Smart city» տեխնոլոգիաները, արհեստական արբանյակների և օդատիեզերական ծառայությունների, ինչպես նաև խոշոր քաղաքներում տրանսպորտային համակարգերի կառավարման ոլորտում։ Ընկերությունն այս ոլորտներում Ադրբեջանի հետ համագործակցության նախաձեռնություններով է հանդես եկել։
Նշենք, որ Իտալիայի և Ադրբեջանի ռազմական համագործակցությունն ակտիվորեն զարգանում է, պարբերաբար փոխայցեր են կազմակերպվում։ Մասնավորապես, հունիսին այցով Իտալիայում էր Ադրբեջանի ՊՆ պատվիրակությունը, որի ընթացքում էլ նշյալ իտալական ընկերության հետ ռազմական ինքնաթիռների ձեռքբերման համաձայնագիր է ստորագրվել։ Հենց «Լեոնարդո» կոնցեռն է հայտարարել Ադրբեջանի ռազմաօդային ուժերի համար C-27J տրանսպորտային ինքնաթիռների մատակարարման պայմանագրի կնքման մասին։
«Իտալիայի և Ադրբեջանի միջև առևտրային համագործակցությունն ամրապնդվել է C-27J Spartan-ի մատակարարման պայմանագրի ստորագրմամբ»,- ասվում է ընկերության հաղորդագրության մեջ։
«Լեոնարդո»-ից նաև նշել են, որ համաձայնագիրն Ադրբեջանի զինված ուժերի արդիականացման լայնածավալ ծրագրի մի մասն է, որն ավելի մեծ ուշադրություն է դարձնում իտալական արդյունաբերության արտադրանքին։
Էմմա Չոբանյան
