Քաղաքականություն
03.08.2023 | 12:52
ԱՄՆ պետքարտուղարի Կովկասյան բանակցությունների հարցերով ավագ խորհրդական, ԵԱՀԿ Մինսկի խմբի ամերիկացի համանախագահ Լուիս Բոնոն ժամանել է տարածաշրջան՝ քննարկելու ԱՄՆ-ի աջակցությունը խաղաղության գործընթացին և տևական ու արժանապատիվ խաղաղության ձեռքբերմանը։ Այս մասին ադրբեջանական Թուրան գործակալությանն ասել է ԱՄՆ Պետքարտուղարության խոսնակ Մեթյու Միլլերը։
«Պարոն Բոնոն նախատեսում է հանդիպումներ ունենալ առանցքային շահագրգիռ կողմերի հետ՝ աջակցելու հայ-ադրբեջանական խաղաղության գործընթացին: Նա կայցելի և՛ Ադրբեջան, և՛ Հայաստան»,- նշել է Միլլերը։
Նրա խոսքով՝ Բոնոն քննարկելու է Լեռնային Ղարաբաղի բնակչության հումանիտար պայմանները, իրավունքների ու անվտանգության հարցերը։
«Մենք հետևողականորեն հայտարարում ենք, որ տարածաշրջանում խաղաղությունը պետք է իր մեջ ներառի պաշտպանության այդ միջոցները»,- ասել է Պետքարտուղարության խոսնակը։
Նա հավելել է, որ պատրաստ են «նպաստել ցանկացած գործընթացի, որը խաղաղություն և կայունություն կբերի Հարավային Կովկասի ժողովուրդներին»։
Հավելենք, որ Լուիս Բոնոն արդեն Հայաստանում է։ Նա նախօրեին հանդիպել է ՀՀ Անվտանգության խորհրդի քարուղար Արմեն Գրիգորյանին։
Էմմա Չոբանյան
