Քաղաքականություն
02.08.2023 | 14:04
ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցում անդրադարձել է ՀՀ վարչապետ Նիկոլ Փաշինյանի հայտարարությանն այն մասին, որ Ուկրաինայում պատերազմի պատճառով Մոսկվան ավելի քիչ է ներգրավված Արցախյան հակամարտության կարգավորման գործընթացում։
«Խոսակցությունները, որ Ուկրաինայում հատուկ ռազմական գործողության պատճառով արտաքին քաղաքական ուղղությունները ՌԴ-ի համար ավելի քիչ առաջնահերթ են, չունեն փաստագրական հիմք։ Մենք մնում ենք ներագրավված Հայաստան-Ադրբեջան հարաբերությունների կարգավորման գործընթացում։ Մենք ամեն ինչ անում ենք տարածաշրջանում կայուն խաղաղության ու համաձայնության հասնելու համար»,- ասել է Զախարովան՝ նշելով, որ վերջին ամիսներ նույնպես ակտիվ շփումներ են եղել։
Խոսելով Արցախից ռուս խաղաղապահների հնարավոր հեռանալու մասին՝ Զախարովան կրկին կարևորել է նրանց դերակատարումը։
«Անհասկանալի են ռուս խաղաղապահների՝ ԼՂ-ից դուրս գալու մասին հայտարարությունները ներկա ոչ դյուրին հումանիտար իրավիճակի պայմաններում։ Մեր խաղաղապահները կարևոր գործառույթ են իրականացնում․ դա գերիների փոխանակումն է, ականազերծումը, հումանիտար օգնության տրամադրումը, միջադեպերի լուծումը։ Հայաստանի կառավարության տեսակետից այս գործողություններն օգտակար չեն։ Առաջին անգամ չէ, որ երկկիմաստություններ կան։ Այն բանից հետո, երբ Հայաստանի իշխանությունները Լեռնային Ղարաբաղը ճանաչել են ադրբեջանական, ՌԴ-ի հասցեին ջանքերի անբավարարության մասով որևէ պահանջ տեղին չէ»,- հայտարարել է Զախարովան։
Էմմա Չոբանյան
