15.09.2026 | 22:23
Ֆուտզալի Հայաստանի հավաքականը ոչ-ոքի խաղաց Մոլդովայի հետ
Ռուսաստանում մեկ օրում ավելի քան 10 զինկոմիսարիատ են հրկիզել
Քաղաքականություն
02.08.2023 | 16:58
Վերջին 24 ժամվա ընթացքում Ռուսաստանում, Mediazona-ի հաշվարկներով, հրկիզվել է առնվազն 11 զինկոմիսարիատ, փոխանցում է Meduza-ն։
Մասնավորապես, հուլիսի 31-ի երեկոյան Սանկտ Պետերբուրգում 53-ամյա տղամարդը հրկիզել է Չայկովսկու փողոցում գտնվող զինկոմիսարիատի շքամուտքը։ Տղամարդն առնվազն երկու «Մոլոտովի կոկտեյլ» է նետել զինկոմիսարիատի դռան ուղղությամբ, որից հետո մեքենայով հարվածել է շենքի բակ տանող դարպասին։ Տղամարդը պատմել է, որ խաբեբաները համոզել են իրեն մի քանի վարկ վերցնել, իսկ երկու շաբաթ անց բանկի անվտանգության աշխատակիցն իրեն կապել է նաև ԱԴԾ աշխատակիցների հետ։ Նա խոստացել է օգնել դուրս գրել պարտքերը, բայց դրա դիմաց խնդրել է մասնակցել զինկոմիսարիատների աշխատակիցների շրջանում խարդախության հետաքննությանը։ Դա անելու համար, ըստ տղամարդը, ինքը պետք է հրկիզեր հաստատության դուռը՝ զինվորականների ուշադրությունը շեղելու համար։
Մոժայսկում էլ, ըստ Shot և Baza տելեգրամ ալիքների, խաբեբաները զանգահարել են 45-ամյա մի կնոջ՝ ներկայանալով որպես բանկի աշխատակից, և ասել, որ փորձում են նրա անունով վարկ վերցնել։ Որպեսզի դա տեղի չունենա, նրան առաջարկել են դյուրավառ հեղուկ լցնել զինկոմիսարիատի շենքի ապակիներին։
Mediazona-ն նշում է, որ օգոստոսի 1-ին նմանատիպ պատմություն է պատմել 24-ամյա ուսուցչուհին Ռոսսոշ քաղաքից, որին բերման են ենթարկվել զինկոմիսարիատի վրա «Մոլոտովի կոկտեյլ» նետելու ժամանակ։
Chita.ru-ն գրել է, որ Ագինսկոյե գյուղում էլ 17-ամյա աղջիկը փորձել է հրկիզել զինկոմիսարիատը՝ խաբեբաների կողմից զանգ ստանալուց հետո։ Նա պնդում է, որ համոզված է եղել, որ զինկոմիսարիատում «դավաճան» կա, որն Ուկրաինայի հետախուզությանն է փոխանցում պատերազմի մասնակից գյուղի բնակիչների տվյալները։
Զինկոմիսարիատների հրկիզում կամ հրկիզման փորձեր են տեղի ունեցել նաև Պոդոլսկում (երկու թոշակառու է ձերբակալվել), Կալուգայում (77-ամյա կին է ձերբակալվել), Չելյաբինսկի մարզում, Կոպեյսկում (ձերբակալվել է 55-ամյա կին), Վերխնեուրալսկում (35-ամյա կին է ձերբակալվել)։
Սեստրորեցկում էլ փաթեթները ձեռքին զինկոմիսարիատ է մտել մի կին, որը զգուշացրել է, որ պատրաստվում է հրդեհել շենքը։
BBC-ի ռուսական ծառայությունն էլ հաշվարկել է, որ հուլիսի 29-ից Ռուսաստանում զինկոմիսարիատները հրկիզելու 17 փորձ է գրանցվել։
Էմմա Չոբանյան
