Պաշտոնյաների դեպքում գործուն զղջալու ինստիտուտի կիրառումն անպատժելիության խրախուսում է․ Սաքունց․ ՏԵՍԱՆՅՈՒԹ

Քաղաքացիական հասարակության կազմակերպությունները նամակով դիմել են ՀՀ նախագահ Վահագն Խաչատուրյանին՝ կոչ անելով չստորագրել ԱԺ-ի ընդունած՝ ծանր և առանձնապես ծանր հանցագործությունների կատարման մեջ մեղադրվող անձանց համար գործուն զղջալու հիմքով քրեական պատասխանատվությունից ազատելու հնարավորություն նախատեսող օրենքը։

Նշենք, որ Հուլիսի 11-ին և 12-ին Ազգային ժողովն արտահերթ նստաշրջանի շրջանակներում արտահերթ կարգով առաջին և երկրորդ ընթերցմամբ ամբողջությամբ ընդունել է ՀՀ քրեական օրենսգրքում լրացումներ կատարելու մասին ՀՀ օրենքի նախագիծը, որով ՀՀ քրեական օրենսգրքի 81-րդ հոդվածը լրացվել է նոր մասերով՝ գործուն զղջալու հիմքով քրեական պատասխանատվությունից ազատելու հնարավորություն նախատեսելով նաև առաջին անգամ ծանր և առանձնապես ծանր հանցագործությունների կատարման մեջ մեղադրվող անձանց համար:

Մեդիա կենտրոնում այսօր ընթանում է  քննարկում՝ «Քրեական պատասխանատվությունից ազատե՞լ ծանր կամ առանձնապես ծանր հանցագործության համար մեղադրվողներին» թեմայով։

Բանախոսներն են՝ ՀՔԱՎ գրասենյակի նախագահ Արթուր Սաքունցը, «Իրավունքների պաշտպանություն առանց սահմանների» ՀԿ փորձագետ Անահիտ Մկրտչյանը, քրեական գործերով փաստաբան, Իրավունքի զարգացման և պաշտպանության hիմնադրամի իրավական հարցերով փորձագետ Դավիթ Գյուրջյանը, ՀՀ ԱՆ Քրեական օրենսդրության, քրեակատարողական և պրոբացիայի ոլորտի քաղաքականության մշակման վարչության Քրեական և քրեադատավարական օրենսդրության մշակման բաժնի պետ Արփի Լազարյանը։

«Ցանկացած օրենսդրական նախաձեռնություն պետք է դիտարկել նաև քրեական արդարադատության նպատակների, պետության ունեցած մարտահրավերներին առնչվելու տեսանկյունից։

Անկյունաքարային է անպատժելիության հաղթահարումը․ տարիներ շարունակ չի գործում արդյունավետ պատասխանատվության ինստիտուտը․ կատարված հանցագործությունների հետևանքով խախտվում են մարդու իրավունքները և պետության շահերը։
Արդյո՞ք օրենսդրական այս կարգավորումը կնպաստի անպատժելիության վերացմանը։

Նախ՝ այս նախագիծը պետք է պատշաճ և արդյունավետ քննարկվեր առնվազն այն կազմակերպություների հարթակներում, որոնք ունեն առաջարկներ։
Երկրորդ՝ կոռուպցիոն հոդվածների առումով այստեղ կա պոզիտիվ խտրականության մոտեցում․ պաշտոնյաների դեպքում գործուն զղջալու հիմքով պատասխանատվությունից ազատելը նշանակում է հենց անպատժելիության խրախուսում» ,- քննարկման ժամանակ նշեց Սաքունցը։

Մանրամասները՝ տեսանյութում։