24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Զապորոժիեի ԱԷԿ-ի տարածքում ականներ են տեղադրվել. ՄԱԳԱՏԷ
Քաղաքականություն
25.07.2023 | 11:11
Ատոմային էներգիայի միջազգային գործակալության (ՄԱԳԱՏԷ) փորձագետները Զապորոժիեի ատոմակայանի շուրջ հակահետևակային ականներ են հայտնաբերել, որոնք տեղադրել են ռուս զինվորականները։ Այս մասին ասվում է ՄԱԳԱՏԷ-ի հայտարարության մեջ, գրում է VOA-ն։
ՄԱԳԱՏԷ-ի փորձագետները տեսել են մի քանի ականներ, որոնք տեղադրված են էլեկտրակայանի պարագծով արտաքին և ներքին ցանկապատերի միջև։ Ինչպես նշվում է հայտարարության մեջ, «պայթուցիկների առկայությունը հակասում է ՄԱԳԱՏԷ-ի անվտանգության չափանիշներին և լրացուցիչ հոգեբանական ճնշում է ստեղծում աշխատողների վրա»։
ՄԱԳԱՏԷ-ի փորձագետների նախնական գնահատմամբ՝ այդ ականների պայթյունը չի կարող սպառնալ էլեկտրակայանի միջուկային անվտանգությանը։ Ատոմային էներգիայի միջազգային գործակալության փորձագետները, որոնք ստուգումներ են անցկացրել կայանում, ծանր զինտեխնիկա չեն հայտնաբերել։
Այնուամենայնիվ, հայտարարության մեջ նշվում է, որ ՄԱԳԱՏԷ-ի ներկայացուցիչներին շարունակում են արգելել մուտք գործել ԶԱԷԿ-ի ռեակտորների և տուրբինային սրահների տանիքներ, նաև երրորդ և չորրորդ էներգաբլոկներ, որոնք առանձնակի հետաքրքրություն են ներկայացնում։
Հուլիսի սկզբին Ուկրաինայի նախագահ Վլադիմիր Զելենսկին, վկայակոչելով ուկրաինական հետախուզությանը, հայտարարել էր, որ Ռուսաստանը պայթուցիկներ է տեղադրել մի քանի էներգաբլոկների տանիքներին։ Մոսկվան հերքում է մեղադրանքները։
