16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Միլիարդատեր Բրենսոնի դիմումից հետո Լոնդոնը չեղարկել է ռուս գործարար Օլեգ Տինկովի դեմ պատժամիջոցները
Քաղաքականություն
20.07.2023 | 18:52
Մեծ Բրիտանիայի իշխանությունները չեղարկել են ռուս գործարար Օլեգ Տինկովի նկատմամբ սահմանված անձնական պատժամիջոցները։ Ֆինանսական պատժամիջոցների իրականացման գրասենյակի ծանուցումը հրապարակված է բրիտանական կառավարության կայքում, գրում է Meduza-ն։
2023 թվականի մարտին Տինկովը դիմել էր Մեծ Բրիտանիայի ԱԳՆ-ին՝ պատժամիջոցների ցուցակից իրեն հանելու խնդրանքով։ Հետո հաղորդվել էր, որ Մեծ Բրիտանիայում բնակվող գործարար Միխայիլ Խոդորկովսկին ևս աջակցության կոչ է ուղարկել։
Օրերս էլ հայտնի դարձավ, որ բրիտանացի հայտնի միլիարդատեր Ռիչարդ Բրենսոնը կոչ է արել Մեծ Բրիտանիայի իշխանություններին չեղարկել Տինկովի նկատմամբ կիրառված պատժամիջոցները։ Բրենսոնի նամակը կցվել է Տինկովի պաշտոնական բողոքին՝ ընդդեմ Մեծ Բրիտանիայի ԱԳՆ-ի պատժամիջոցների մասին որոշման։
Բրենսոնը նշել է, որ 20 տարի է՝ ճանաչում է Օլեգ Տինկովին, և նրա ներառումը պատժամիջոցների ցուցակում համարում է սխալ։ Նա Բրիտանիայի իշխանությունների որոշումն անվանում է անհիմն։
«Չնայած նա հարուստ գործարար է, նա երբեք չի եղել օլիգարխ։ Ես միշտ նրան ճանաչել եմ որպես դինամիկ ձեռներեցի: Ուստի ես համակրում եմ նրան, սատարում և շարունակում եմ աջակցել»,- ասվում է Բրենսոնի նամակում։
Հավելենք, որ Օլեգ Տինկովը հակապատերազմական դիրք է գրավում Ուկրաինա ռուսական զորքերի լայնամասշտաբ ներխուժման սկզբից ի վեր։ 2022 թվականի հոկտեմբերին նա հրաժարվել է Ռուսաստանի քաղաքացիությունից։
Էմմա Չոբանյան
