Եթե մարդը խոսում է, և ձերբակալում են՝ վատ է. բայց խուլիգանության հոդվածով մեղադրանք կա, պիտի հիմնավորվի՝ ի՞նչ նկատի ունեն․ Թագուհի Ղազարյան․ ՏԵՍԱՆՅՈՒԹ

Factor TV–ի հարցազրույցը «Քաղաքացիական պայմանագիր» խմբակցության պատգամավոր Թագուհի Ղազարյանի հետ

-«Պատասխան ես տալու իմ զոհված եղբայրների համար»,- վարչապետ Նիկոլ Փաշինյանին դիմելով՝ այս արտահայտությունը հնչեցնելու համար կիրակի ձերբակալվել է Դավիթ Ավետիսյանը՝ «Սասնա Ծռեր» խմբավորման անդամ, ՊՊԾ գնդի գրավման գործով ազատազրկված Վարուժան Ավետիսյանի որդին։ Փաստաբան Արայիկ Պապիկյանը հայտնել է, որ ոստիկանները նրան բիրտ ուժով պառկեցրել են գետնին` փակելով շնչուղիները, այդ ժամանակ Դավիթն արտաբերել է «դավաճան» բառը, վիրավորական այլ արտահայտություն։ Նա մեղադրվում է խուլիգանություն կատարելու մեջ։ Չե՞ք կարծում, որ նման արտահայտություն անելու համար ձերբակալելը խնդրահարույց է և նման է քաղաքական հետապնդման։

-Եթե դեպքը ճշգրտորեն տեղի է ունեցել այնպես, ինչպես նկարագրում է փաստաբանը, ապա դա խնդրահարույց է։ Ես ընդհանրապես տեղյակ չեմ այդ դեպքի մանրամասներից, կարծում եմ՝ պետք է լսել նաև պատասխանատվության ենթարկող կողմին, ծանոթանալ հիմնավորումներին, թե ինչ պատճառաբանությամբ և ինչպիսի վարքի համար են ձերբակալել։

-Քաղաքացին վիրավորական արտահայտություններ է արել վարչապետի ուղղությամբ և ձերբակալվել է․ դա չի՞ դիտարկվում որպես քաղաքական գործ։

-Ես այնտեղ չեմ եղել, ո՛չ վկա եմ, ո՛չ փաստաբան։ Բայց եթե մարդը խոսում է, և դրա համար նրան ձերբակալում են, դա վատ է։ Իսկ եթե խուլիգանության հոդվածով մեղադրանք կա առաջադրած, վստահ եմ, որ մեղադրանք առաջադրողը պետք է կարողանա հիմնավորել, թե ինչ նկատի ունի՝ խուլիգանական վարք ասելով։

Հարցազրույցն ամբողջությամբ՝ տեսանյութում։

Ռոբերտ Անանյան