04.11.2024 | 22:14
Ադրբեջանը 4,7 մլն դոլար է վճարել լոբբիստներին՝ COP29-ից առաջ իր «ավտորիտար իմիջը մաքրելու» համար․ Democracy for Sale
Ֆրանսիայի քաղաքապետերը երկրի բնակչությանը կոչ են արել մոբիլիզացվել ընդդեմ բռնության
Քաղաքականություն
03.07.2023 | 23:11
Ֆրանսիայի քաղաքապետերը կոչ են արել հանրությանը և ընտրված պաշտոնյաներին հավաքվել ամբողջ երկրի մունիցիպալիտետներում՝ ցույց տալու «ընդհանուր մոբիլիզացիա» ընդդեմ ցույցերի, որոնք ցնցել են Ֆրանսիան անցած երեքշաբթիից այն բանից հետո, երբ ոստիկանի կողմից սպանվեց 17-ամյա մի պատանի, հաղորդում է France-Presse (AFP) գործակալությունը։
Միևնույն ժամանակ, անցյալ կիրակի երեկոյան ավելի քիչ ձերբակալություններ եղան, ինչը ենթադրում է, որ բռնությունների ալիքը Ֆրանսիայի քաղաքներում կարող է թուլանալ, նշում է AFP-ն:
«Քաղաքացիների համընդհանուր մոբիլիզացիա՝ հանրապետական կարգերին վերադառնալու համար» կոչը հնչել է այն բանից հետո, երբ հուլիսի 1-ի երեկոյան Փարիզի Լ’Էյ-լե-Ռոզ արվարձանում գտնվող քաղաքապետի տուն է մխրճվել այրվող մեքենա: Հարձակումը, որի հետևանքով վիրավորվել է քաղաքապետի կինը, համատարած վրդովմունք է առաջացրել։
Երկրի քաղաքապետերի ասոցիացիայի մամուլի հաղորդագրության մեջ ասվում է, որ «Ֆրանսիայի ամբողջ տարածքում գտնվող կոմունաները լուրջ անկարգությունների թատերաբեմ են, որոնք ծայրահեղ կոշտությամբ ուղղված են հանրապետական խորհրդանիշներին»:
Հիշեցնենք՝ Ֆրանսիայում բողոքի ցույցերը սկսվել են հունիսի 27-ի երեկոյան՝ ոստիկանների կողմից 17-ամյա դեռահասի սպանությունից հետո:
Տաթև Ֆռանգյան
