Էրդողանն ու Ստոլտենբերգը քննարկել են ՌԴ-ում Պրիգոժինի ապստամբությունը

Թուրքիայի նախագահ Ռեջեփ Թայիփ Էրդողանը հեռախոսազրույց է ունեցել ՆԱՏՕ-ի գլխավոր քարտուղար Յենս Ստոլտենբերգի հետ։ Այս մասին հայտնում է Թուրքիայի նախագահի աշխատակազմի հաղորդակցության վարչությունը, փոխանցում է Անադոլու գործակալությունը։

Հաղոդագրության համաձայն՝ կողմերը քննարկել են Ռուսաստանում վերջին իրադարձությունները։ Նշվել է, որ Ռուսաստանում իրավիճակի ապաէսկալացումը կանխել է ուկրաինական ճակատում անդառնալի հումանիտար աղետները։ Էրդողանը հույս է հայտնել, որ Ռուսաստանում տեղի ունեցած վերջին իրադարձությունները նոր հանգրվան կդառնան Ուկրաինայում արդար խաղաղության ճանապարհին։

Բանակցությունների ընթացքում շոշափվել է նաև ՆԱՏՕ-ին Շվեդիայի անդամակցության թեման։ Էրդողանը նշել է, որ Անկարան պահպանում է կառուցողական վերաբերմունքը դաշինքին Ստոկհոլմի միանալու հարցում։ Այնուամենայնիվ, նա նշել է, որ քանի դեռ Շվեդիայում PKK/PYD/YPG ահաբեկչական կազմակերպության կողմնակիցներն ազատորեն գործում են, անիմաստ է այդ երկրում փոփոխել հակաահաբեկչական օրենսդրությունը։ Թուրքական կողմը նաև ընդգծել է «Անկարայի հանդեպ անարդարությունը F-35 կործանիչների մատակարարման համատեքստում, ինչպես նաև Թուրքիայի՝ F-16 կործանիչների հարցով դիմումները ՆԱՏՕ-ին Շվեդիայի անդամակցության հարցի հետ կապելը»։

Ստոլտենբերգն իր հերթին Թվիթերում նշել է, որ Թուրքիան ու ՆԱՏՕ-ն շարունակում են համատեղ աշխատանքը դաշինքին Շվեդիայի միանալու հարցում։ Նրա խոսքով՝ Վիլնյուսում ՆԱՏՕ-ի գագաթնաժողովից առաջ «դրական բանակցություններ» է ունեցել Թուրքիայի նախագահի հետ։

Հիշեցնենք, որ ռուսական «Վագներ» մասնավոր ռազմական խմբավորման զինյալներն ապստամբություն էին սկսել և հունիսի 24-ի գիշերը մտել Դոնի Ռոստով, այնուհետև շարժվել դեպի Մոսկվա։ Սակայն հունիսի 24-ի երեկոյան «Վագների» ղեկավար Եվգենի Պրիգոժինը հայտարարել էր, որ Բելառուսի նախագահ Ալեքսանդր Լուկաշենկոյի հետ բանակցություններից հետո  «հետ են դարձնում իրենց շարասյուները» և «հեռանում են դաշտային ճամբարներ՝ պլանի համաձայն»։

Էմմա Չոբանյան