Քաղաքականություն
20.06.2023 | 15:51
Թուրքիայի նախագահական ընտրություններում Ռեջեփ Թայիփ Էրդողանի հաղթանակից հետո գլխավոր ընդդիմադիր Ժողովրդահանրապետական կուսակցությունում խմորումները շարունակվում են։
Մասնավորապես, Ժողովրդահանրապետական կուսակցությունից (CHP) Ստամբուլի քաղաքապետ Էքրեմ Իմամօղլուն, որը նախագահական ընտրություններում կրած պարտությունից հետո առաջ է քաշում կուսակցության ներսում փոփոխությունների հարցը, ասել է, որ վերափոխումը, «անհրաժեշտության դեպքում», պետք է ներառի նաև կուսակցության ղեկավարության փոփոխությունը, գրում է Turkish Minute-ը։
Հիշեցնենք, որ մայիսին տեղի ունեցած նախագահական ընտրություններում Էրդողանը հաղթել էր CHP-ի ղեկավար Քեմալ Քըլըչդարօղլուին։
Իմամօղլուն լրագրող Ֆաթիհ Ալթայլըին ասել է, որ կուսակցության վերափոխման հարցը պետք է ներառի այն, ինչ պետք է, անհրաժեշտության դեպքում՝ այն պետք է ներգրավվի նաև Քըլըչդարօղլուին։
«Մենք պարտվել ենք ընտրություններում։ 48 տոկոսը, իհարկե, վատ չէ, բայց դա այն տոկոսն է, որը բավարար չէ հաղթելու համար, և մենք չենք կարող վարվել այնպես, կարծես ընտրություններում պարտվելուց հետո ոչինչ չի եղել»,- ասել է Իմամօղլուն։
Նա ասել է, որ իր վերջին հանդիպումը CHP-ի ղեկավարի հետ «շատ դրական» է եղել, և որ կարծում է, որ դա փոփոխությունների ճանապարհ կհարթի։
«Այս հարցը միայն Իմամօղլուի կամ որևէ այլ անձի մասին չէ: Մեզ համար էական է վերականգնել ընտրողների վստահությունը մինչև 2024 թվականի ՏԻՄ ընտրությունները»,- ասել է Ստամբուլի քաղաքապետը։
Հավելենք, որ ընտրություններից հետո Իմամօղլուն անուղղակիորեն քննադատել է CHP-ի առաջնորդ Քեմալ Քըլըչդարօղլուին՝ պնդելով, որ մակերեսային ճշգրտումները, ինչպիսիք են կուսակցության կենտրոնական կառավարման կոմիտեի լուծարումը և թարմացումը, բավարար չեն բովանդակալից վերափոխման հասնելու համար։
Ընդդիմադիր կուսակցության այլ գործիչներ, ներառյալ խորհրդարանական խմբի փոխնախագահ Օզգյուր Օզելը և Բոլուի քաղաքապետ Թանջու Օզջանը, նույնպես ազդանշաններ են ուղարկում CHP-ի ներսում մոտալուտ և դրամատիկ վերափոխման մասին։
Հավելենք, որ առաջիկայում սպասվում է կուսակցության համագումարը, որտեղ էլ, ըստ երևույթին, քննարկվելու է կուսակցության նախագահի փոփոխման հարցը։
Էմմա Չոբանյան
