30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Սամվել Բալասանյանի որդուն Իրաքում դեսպան նշանակելու ագրեմանն ուղարկվել է Բաղդադ
Քաղաքականություն
19.06.2023 | 17:55
Գյումրիի նախկին քաղաքապետ Սամվել Բալասանյանի որդին՝ գործարար Միսակ Բալասանյանը, հնարավոր է, արտակարգ և լիազոր դեսպան նշանակվի Իրաքի հանրապետությունում։ Այս տեղեկությունը Factor.am-ին հայտնում են ՀՀ իշխանություններին մոտ կանգնած աղբյուրները։
Factor.am-ին հայտնի դարձավ, որ Միսակ Բալասանյանի ագրեմանն արդեն ուղարկվել է Բաղդադ և սպասում են այդ երկրի հաստատմանը։ Միսակ Բալասանյանը Նիկոլ Փաշինյանի ղեկավարած ՔՊ կուսակցության անդամ չէ։ Թե ինչ սկզբունքով է որոշվել նրան Իրաքում դեսպան նշանակել, առայժմ հայտնի չէ։
Այս տեղեկությունների վերաբերյալ մեկնաբանություն խնդրեցինք նաև ՀՀ ԱԳ նախարարության մամուլի խոսնակ Անի Բադալյանից։ Նա մեր տեղեկությունները ոչ հերքեց, ոչ հաստատեց։
«Ինչպես գիտեք, ՀՀ դեսպանների նշանակումները կատարվում են ՀՀ նախագահի հրամանագրով, որի ժամանակ հանրությունը պատշաճ տեղեկացվում է»,-ասաց նա։ Տևական ժամանակ է Սամվել Բալասանյանն ու նրա որդին Միսակ Բալասանյանը չեն պատասխանում մեր հեռախոսազանգերին։
Միսակ Բալասանյանը գործարար է։ Նա զբաղվում է Բալասանյաններին պատկանող «Գյումրի Գարեջուր» ընկերության կառավարմամբ։ 2018 թվականին տեղի ունեցած հեղափոխությունից հետո ՊԵԿ-ը հայտնեց, որ Բալասանյաններին պատկանող այս ընկերությունը 2016-2017 թվականների ընթացքում 300 միլիոն ՀՀ դրամի չափով պակաս հարկեր է վճարել պետական բյուջե։ Այս բացահայտումից հետո Միսակ Բալասանյանի ընկերությունը վերականգնեց պետությանը պատճառված վնասները։
Նարեկ Կիրակոսյան
