24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Ուկրաինական բանակը, հնարավոր է, դադար վերցնի հարձակումներում. ISW
Քաղաքականություն
19.06.2023 | 14:33
Պատերազմի ուսումնասիրման ամերիկյան ինստիտուտը (ISW) հերթական զեկույցում ենթադրություն է հայտնել, որ ուկրաինական բանակը դադար կվերցնի կամ արդեն վերցրել է հարձակումներում՝ իր մարտավարությունը վերագնահատելու համար, գրում է BBC-ի ռուսական ծառայությունը։
Ինստիտուտի վերլուծաբանները նման ենթադրություն են անում՝ վկայակոչելով Էստոնիայի ռազմական հետախուզության ղեկավար Մարգո Գրոսբերգին և հունիսի 17-ին Wall Street Journal-ի հրապարակումը, որտեղ խոսվում է նաև վերջին օրերին ուկրաինական հարձակումների դադարեցման մասին։
«Այդ հաղորդումները համընկնում են ISW-ի վերջերս ուրվագծված դիտարկումներին՝ կապված Ուկրաինայի հարավային և արևելյան հատվածներում տեղայնացված հակագրոհների նկատմամբ ուկրաինացիների մասշտաբների և մոտեցման հետ»,-ասվում է զեկույցում։
Հեղինակները նշում են, որ իրենք և այլ փորձագետներ ասում են, որ ուկրաինական բանակը դեռ մարտի դուրս չի բերել իր պահեստազորի հիմնական մասը։
«Օպերատիվ դադարները սովորական երևույթ են մեծ հարձակումներում, այդ դադարը չի նշանակում ուկրաինական հակահարձակման վերջ»,- ասվում է զեկույցում։
Նշվում է նաև, որ ուկրաինական ստորաբաժանումները վերջին 24 ժամվա ընթացքում շարունակել են հարձակումները ռազմաճակատի չորս հատվածներում և տեղ-տեղ որոշակի առաջընթաց գրանցել։
Հավելենք, որ Մարգո Գրոսբերգը մամուլի ասուլիսում հայտարարել էր ոչ թե հարձակումների դադարեցման մասին, այլ նշել, որ ներկա հարձակումները, իր կարծիքով, պարզապես ոչ մեծ ուժերով փորձարկում են ռուսների պաշտպանությունը, և մեծ հարձակում չի սկսվի առնվազն ևս մեկ շաբաթ։
Էմմա Չոբանյան
