14.09.2026 | 14:30
ԱԺ քառօրյայի մեկնարկը` ՈՒՂԻՂ
ԿԳՄՍՆ-ն մոտ 23 մլն դրամ է տրամադրել ԵՊՀ-ին՝ հայ-ռուսական գիտակրթական ֆորում անցկացնելու համար
Հասարակություն
13.06.2023 | 21:55
Երևանի պետական համալսարանում այսօր մեկնարկել է հայ-ռուսական գիտակրթական ֆորումը, որի կազմակերպման և անցկացման համար Կրթություն, գիտության, մշակույթի և սպորտի նախարարությունը մոտ 23 միլիոն դրամ է տրամադրել Երևանի պետական համալսարանին։
Ըստ կողմերի միջև կնքված պայմանագրի՝ ֆորումի ընթացքում քննարկվելու է հայ-ռուսական համագործակցության ընդլայնումը, բարձրագույն և հետբուհական կրթության ոլորտում երկու երկրների առաջատար հաստատությունների միջև հաջողված փորձի փոխանակումը, ինչպես նաև գիտության բնագավառում համատեղ ծրագրերի իրականացումը։ Ֆորումի ընթացքում նախատեսվում է հայ-ռուսական աշխատանքային խմբի նիստը՝ ՀՀ-ում համատեղ հանրակրթական հաստատությունների ստեղծման հայեցակարգի քննարկման նպատակով, երկկողմ բանակցություններ և խորհրդակցություններ Հայաստանի ու Ռուսաստանի բուհերի ռեկտորների աշխատանքային փոխգործակցության նպատակով, նաև ստորագրվելու են մի շարք երկկողմ համաձայնագրեր։
22 միլիոն 600 հազար դրամը, ըստ պայմանագրի, բաշխվելու է 200 մասնակիցների (որոնցից 100-ը ՀՀ ժամանած ռուսաստանցիներն են լինելու) սննդի, կեցության, նրանց համար հուշանվերի գնման, տրանսպորտային միջոցների և տեխնիկական մի շարք իրերի համար։ Նախատեսվում է նաև բարձրակարգ՝ VIP սպասարկում «Զվարթնոց» օդանավակայանում Հայաստան ժամանող բարձրաստիճան ղեկավարության համար։ Միայն այս ընդունելության համար կվճարվի 400 հազար դրամ։
Ռոզա Վարդանյան
