ՌԴ-ն չի՛ հեռացել ՀՀ-ից, մի՛ հանեք նրա վրայից պատասխանատվությունը․ չի՛ կատարում պարտականությունը, բարդում է Եվրոպայի վրա․ Գևորգ Մելիքյան. ՏԵՍԱՆՅՈՒԹ

Ադրբեջանի զինուժը, այդ թվում՝ ականանետից, այսօր կրակ է բացել Տրետուքի և Սոթքի հատվածում տեղակայված հայկական դիրքերի ուղղությամբ։ Ադրբեջանն ամիսներ շարունակ կեղծ լուրեր է տարածում, թե հայկական կողմերն են կրակում։

Factor TV-ին տված հարցազրույցում Ազգային դիմակայունության հայկական ինստիտուտի տնօրեն, քաղաքական գիտությունների թեկնածու Գևորգ Մելիքյանը համաձայնվեց ՀՀ ԱԳՆ-ի այսօր տարածած հաղորդագրության հետ, որ այսպիսով Ադրբեջանն ուժի կիրառումից առաջ ապահովում է «տեղեկատվական նախապատրաստում» և առկա են լրջագույն վտանգներ, որ Ադրբեջանի ռազմաքաղաքական ղեկավարությունը հող է նախապատրաստում Լեռնային Ղարաբաղում հերթական ագրեսիվ գործողությունների և էթնիկ զտումների իրականացման համար: Բայց փորձագետը նաև կոնկրետ գործողություններ է ակնկալում Հայաստանի իշխանություններից՝ ադրբեջանական մոտալուտ բռնարարքները կանխելու համար։

«Ադրբեջանն ահռելի ծավալով հիբրիդային պատերազմ է մղում Հայաստանի դեմ, հոգեբանական գրոհներ է իրականացնում, և այսօր ադրբեջանական նարատիվներն ուժգին տարածված են Հայաստանում, երբեմն չգիտես՝ հա՞յ է խոսում, թե՞ ադրբեջանցի։ Ադրբեջանը ծուղակներ կստեղծի՝ պարտադրելու, որ Արցախի հայերն ընդունեն Ադրբեջանի քաղաքացիություն, եթե ոչ՝ լքեն Արցախը։ Ադրբեջանի նպատակն է՝ Արցախի հայաթափում և ապառազմականացում, և ես կարծում եմ, որ նա կխուսափի ուղիղ առճակատման գնալ։ Ադրբեջանը մտնի Արցախ՝ դրոշը դնի, ռուսները չեն խոչընդոտելու, Հայաստանի իշխանությունն ի՞նչ է անելու։ Ասում եք՝ պատերազմ չեմ կարող, իսկ ի՞նչ եք պատրաստվում անել։ Փաստն այն է, որ հիմա ՌԴ-ն և Ադրբեջանը «Կոլցո 2» օպերացիա են իրականացնում ԼՂ-ում, սակայն ՀՀ-ն չի պայքարում դրա դեմ, ո՞վ է լուծելու խնդիրը»,- ասաց Գևորգ Մելիքյանը։

Հարցազրույցն ամբողջությամբ՝ տեսանյութում։

Ռոբերտ Անանյան