Քաղաքականություն
13.06.2023 | 15:16
Շվեդիան համաձայնել է Անկարային արտահանձնել թմրամիջոցների ապօրինի շրջանառության համար Թուրքիայում դատապարտված տղամարդուն, որը նաև պաշտպանում էր օրենքից դուրս գործող Քուրդիստանի աշխատավորական կուսակցությանը (PKK)։ Այս մասին հաղորդում է Agence France-Presse-ը, որին վկայակոչում է Turkish Minute-ը։
Թուրքիան Շվեդիային մեղադրում է «ահաբեկիչների», հատկապես՝ PKK-ի անդամների ապաստարան լինելու մեջ և պահանջում վերադարձնել տասնյակ անձանց։
Շվեդիայի կառավարությունը որոշել է արտահանձնել Թուրքիայի 35-ամյա քաղաքացուն, հայտարարել է Արդարադատության նախարարության ներկայացուցիչ Աշրաֆ Ահմեդը։ Այս որոշումը կայացվել է այն բանից հետո, երբ մայիսին Շվեդիայիա Գերագույն դատարանը հնարավոր է համարել նրա հայրենադարձությունը Թուրքիա, որտեղ նա պետք է կրի թմրամիջոցների ապօրինի շրջանառության մեղադրանքով սահմանված պատիժը:
Շվեդիայի Գերագույն դատարանի որոշմամբ՝ տղամարդը 2014 թվականին դատապարտվել է չորս տարի յոթ ամիս ժամկետով ազատազրկում թուրքական բանտում՝ կանեփ պարունակող տոպրակ տեղափոխելու համար։ Նա պայմանական վաղաժամկետ ազատ է արձակվել և տեղափոխվել Շվեդիա, սակայն անցյալ տարվա օգոստոսին թուրք դատախազների պահանջով ձերբակալվել է։
Տղամարդը դեմ է այս որոշմանը՝ պնդելով, որ իրական պատճառը, որի համար իրեն փնտրում են թուրքական իշխանությունները, իր կապերն են քրդամետ Ժողովուրդների դեմոկրատական կուսակցության (HDP) հետ և Թուրքիայի կողմից ահաբեկչական համարվող PKK-ին աջակցությունը։
Հիշեցնենք, որ Թուրքիան ու Հունգարիան ՆԱՏՕ-ի անդամ միակ երկրներն են, որ դեռևս չեն վավերացրել դաշինքին Շվեդիայի անդամակցության հայտը։
Էմմա Չոբանյան
