24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Ադրբեջանը հերթական քարոզչական այցն է կազմակերպել Դադիվանք
Քաղաքականություն
23.05.2023 | 21:27
Ադրբեջանը շարունակում է Արցախի գրավյալ տարածքներում հայ հոգևոր և մշակութային ժառանգության նենգափոխման ու կեղծման գործընթացը։ Բաքվի իշխանություններն այսօր, իբր, Ադրբեջանի կրոնական համայնքների ներկայացուցիչների հերթական քարոզչական այցն են կազմակերպել հայկական Դադիվանք։
Այցը կազմակերպել է Կրոնական կազմակերպությունների հետ աշխատանքի պետական կոմիտեն, որին մասնակցել են Բաքվի իշխանությունների կողմից ստեղծված ալբանա-ուդի քրիստոնեական կրոնական համայնքի և այլ ոչ իսլամական կրոնական համայնքների ներկայացուցիչներ, լրատվամիջոցների ներկայացուցիչներ։
Հավելենք, որ վերջերս Ադրբեջանի Կրոնական կազմակերպությունների հետ աշխատանքի պետական կոմիտեի նախագահ Մուբարիզ Գուրբանլին լրագրողների հետ զրույցում ադրբեջանական քարոզչական թեզերն է հնչեցրել՝ նաև սպառնալով Դադիվանքում գտնվող հայ հոգևորականներին։ Նա պնդել էր, որ հայ հոգևորականները պետք է հեռանան եկեղեցուց։
«Այն պատկանում է կովկասյան Ալբանիային, և վաղ թե ուշ այն կկառավարվի ալբանա-ուդի կրոնական համայնքի կողմից։ Համոզված եմ, որ նրանք այնտեղից կգնան»,- հայտարարել էր Գուրբանլին։
Էմմա Չոբանյան
