16.05.2026 | 21:37
Փաշինյանը ներկայացրել է վարորդական իրավունքից զրկված անձանց խնդրի լուծման իր տարբերակը
Ղազախստանում կտրուկ աճել է երկիր ռուսական ներխուժումը հավանական համարողների թիվը. հարցում
Քաղաքականություն
17.05.2023 | 23:14
Վերջին վեց ամսվա ընթացքում Ղազախստանի քաղաքացիների թիվը, որոնք կարծում են, թե իրենց երկիր ռուսական ներխուժումը հավանական է, կրկնապատկվել է։ Այս մասին են վկայում հանրային կարծիքի վերջին հարցումները, որոնք անցկացրել են տեղական MediaNet և PaperLab կազմակերպությունները, գրում է BBC-ի ռուսական ծառայությունը։
Նշվում է, որ հարցմանը մասնակցել է 1100 մարդ, այն անցկացվել է մայիսի 3-ից 12-ը։
Հարցման արդյունքների համաձայն՝ մասնակիցների 60%-ն ասել է, որ չեզոք է վերաբերվում ուկրաինական պատերազմին, 12,8%-ն աջակցում է Ռուսաստանին այս պատերազմում, 21,1%-ը՝ Ուկրաինային։
Միևնույն ժամանակ, հարցվածների մասնաբաժինը, որոնք կարծում են, թե Ռուսաստանը կարող է ներխուժել նաև Ղազախստան, վերջին վեց ամսվա ընթացքում 8,3%-ից աճել է՝ հասնելով 15%-ի։
Մայիսյան հարցման մասնակիցների գրեթե մեկ երրորդը նշել է, որ իրենց վերաբերմունքը Ռուսաստանի նկատմամբ վատթարացել է Ուկրաինա շարունակական ներխուժման պատճառով, կեսից ավելին ասել է, որ իրենց վերաբերմունքը Ռուսաստանի նկատմամբ չի փոխվել: Հարցվածների 4,7%-ն էլ նշել է, որ իրենց վերաբերմունքը Ռուսաստանի նկատմամբ բարելավվել է։
Ղազախստանը սերտ կապեր է պահպանում ՌԴ-ի հետ, իսկ ուկրաինական պատերազմում չեզոք է՝ միաժամանակ, սակայն, չճանաչելով ՌԴ-ի կողմից ուկրաինական տարածքների օկուպացիան։ Ղազախստանի բնակչության թիվը շուրջ 20 մլն է, որից 3 մլն-ը՝ էթնիկ ռուսներ։
Էմմա Չոբանյան
