15.10.2026 | 18:45
Գևորգ Փարսյանը երրորդ անգամ կպայքարի Կապանի համայնքապետի պաշտոնի համար
Ֆրանսահայերը ընտրությունների 2-րդ փուլում կսատարեն Էմանուել Մակրոնին
Հասարակություն
28.04.2017 | 13:23
Ֆրանսիայի հայկական կազմակերպությունների համակարգող խորհրդի համանախագահներ Մուրադ Փափազյանը և Արա Թորանյանը նամակ են հղել Ֆրանսիայի նախագահական ընտրությունների առաջին փուլում հաղթանակ տարած Էմանուել Մակրոնին՝ նշելով, որ մայիսի 7-ին կայանալիք ընտրությունների երկրորդ փուլում սատարելու են նրան:
Նամակում ասվում է.
«Ցանկանում ենք ողջունել Փարիզում ապրիլի 24-ին Ձեր կատարած այցը Հայոց ցեղասպանությանը նվիրված հուշարձան և շնորհակալություն հայտնել, որ հարգանքի տուրք մատուցեցիք ցեղասպանության մեկուկես միլիոն զոհերի հիշատակին: Ձեր քայլը լիովին տեղավորվում է Ձեր ներգրավվածության գծի մեջ, մասնավորապես ապրիլի 24-ը Հանրապետության օրացույցում ներառելու նախաձեռնության մեջ: Այն վկայում է զոհերի համար արդարության պահանջին Ձեր նվիրվածության մասին:
Արժանապատվության ու մարդու իրավունքների այս հարցը, որի շուրջ մեծ պայքար է ընթանում, պաշտպանության կարիք ունի, մասնավորապես, համարձակ, առաջընթացին ու արժեքներին նվիրված պետական գործիչների պաշտպանության կարիքը:
Այս հարցում Ձեր ներգրավվածությունը, ապրիլի 24-ին Ձեր կատարած քայլը, Ձեզ հետ ունեցած մեր հանդիպումը, հայկական հարցի հետ կապված Ձեր արտահայտած դիրքորոշումը, ինչպես նաև Ֆրանսիայի դիրքերի վերականգնմանն ուղղված Ձեզ առաջնորդող ընդհանուր քաղաքական սկզբունքները մեզ համոզում են, որ Դուք այդպիսի գործիչ եք: Հենց այդ պատճառով էլ այս նամակով ցանկանում ենք մեր աջակցությունը հայտնել Ձեզ առաջիկա նախագահական ընտրություններում»:
Հիշեցնենք, որ ապրիլի 23-ին Ֆրանսիայում տեղի են ունեցել նախագահական ընտրություններ: Ընտրությունների առաջին փուլը հաղթահարել է «Հառաջ» շարժման հիմնադիր Էմանուել Մակրոնին և Ֆրանսիայի «Ազգային ճակատ» ազգայնական կուսակցության առաջնորդ Մարին Լը Պենը:
