08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Ովքեր պատասխանատու են հոկտեմբերի 27-ին ՀՀ-ն գլխատելու համար, դատվելո՛ւ են. Հակոբ Արշակյան․ ՏԵՍԱՆՅՈՒԹ
Քաղաքականություն
02.05.2023 | 17:21
«Ցավում եմ, որ պարոն Վարդանյանն այս պահին դահլիճում չէ, որովհետև մի որոշ հատվածն իր ելույթի, ուզում եմ շարունակել»,- ԱԺ հայտարարությունների ժամին իր արտահերթ ելույթն այսպես սկսեց խորհրդարանի փոխնախագահ Հակոբ Արշակյանը:
«Բոլոր նրանք, ովքեր պատասխանատու են Հոկտեմբերի 27-ին ՀՀ-ը գլխատելու համար, դատվելու են:
Բոլոր նրանք, ովքեր հրամայեցին կազմակերպել Մարտի 1-ին Երևանի փողոցներում քաղաքացիների գնդակահարումը, դատվելու են: Բոլոր նրանք, ովքեր թուլացրել են բանակը՝ ուտելով զինվորի հացը, գնել են ժամկետանց հրթիռներ, քրեական բարքեր են ներմուծել բանակ, պետական մրցույթներում իրենց խնամի- բարեկամների միջոցով թալանել են, ունեզրկել են, տիրացել ՀՀ քաղաքացու ունեցվածքին, դատվելու են և դատվելու են։ Եվ չեն մարսելու այդ գողացվածը։
Ինձանից աջ մասում նստած ընդդիմադիր խմբակցության թե որ անդամներն են թաթախված այս ամենի մեջ, կորոշեն իրավապահ մարմինները։ Եվ, այո, հատիկ-հատիկ բոլորի հետեւից կգնան։ Իսկ եթե ձեր գործընկեր Աղվան Վարդանյանը կցանկանա համագործակցել իրավապահ մարմինների հետ եւ իր ունեցած տեղեկությունների շրջանակներում մատնացույց անել ձեր խմբակցության այն անդամներին, ում դեռ չեն հասցրել իրավապահները մոտենալ, շատ մեծ ուրախությամբ իրավապահները դա կընդունեն որպես օգնություն»,- նշեց Արշակյանը։
Նշենք, որ «Հայաստան»խմբակցության պատգամավոր Աղվան Վարդանյանն իր ելույթում ընդգծել էր․ «Մի քանի պարզ բան՝ ով, ովքեր հրաժարվում են Արցախից, Հայաստանի Հանրապետությունում դատապարտվելու են պետական դավաճանության համար
Ով, ովքեր անկարող են պաշտպանել Հայաստանի Հանրապետության ինքնիշխանությունն ու տարածքային ամբողջականությունը, և իրենք, և իրենց սերունդները տեղ չեն ունենալու մեր երկրում։ Ով, ովքեր ուրանում են Հայոց ցեղասպանությունը, պատասխան են տալու սրբադասվածների առաջ։
Ով, ովքեր թուլացրել, քայքայել են Հայկական բանակը, Արցախի Պաշտպանության բանակը, ներում չեն ունենալու։
Ով, ովքեր հարձակվում են հայկական հիմնասյուներից մեկի՝ Հայ Առաքելական եկեղեցու վրա, նզովված են լինելու։
Ով, ովքեր պառակտում են մեր ժողովրդին Հայաստանում ու Սփյուռքում, ծառայության մեջ են մեր մրցակիցների ու հակառակորդների մոտ։ Ով, ովքեր հրամայել են Եռաբլուրում բռնություն կիրառել զոհվածների ծնողների հանդեպ, դատապարտվելու են։
Ով, ովքեր պետության ուժային կառույցները վերածել են միմիայն սեփական անվտանգության պահպանման բութ գործիքի, ամենավախկոտն ու անպաշտպանն են։
Ով, ովքեր ժողովրդավարության քողի տակ բռնապետություն են փորձում հաստատել, դատապարտված են»։
Մանրամասները՝ տեսանյութում։
