14.12.2025 | 16:37
Ֆիշինգը թիվ 1 կիբեռսպառնալիքն է այսօր․ Մխիթար Հայարապետյան
Պաշտոնական Անկարան հերքում է Էրդողանի վատառողջ լինելու մասին լուրերը
Քաղաքականություն
27.04.2023 | 11:55
Թուրքիայի նախագահի աշխատակազմի հաղորդակցությունների բաժնի ղեկավար Ֆահրեթին Ալթունը հերքել է այն տեղեկությունը, թե նախագահ Ռեջեփ Թայիփ Էրդողանը առողջական խնդիրներ ունի, գրում է DW-ի ռուսական ծառայությունը։
«Մենք կտրականապես հերքում են նման չհիմնավորված հայտարարությունները նախագահ Էրդողանի առողջության վերաբերյալ»․- գրել է նա իր Twitter-ի էջում։ Ալթունը նշել է, որ Էրդողանը կմասնակցի «Աքքույու» ատոմակայանի բացման արարողությանը, որը տեղի կունենա ապրիլի 27-ին, առցանց ձևաչափով։
Չնայած դրան՝ Թուրքիայի ընտրություններից երեք շաբաթ առաջ Էրդողանը չեղյալ է հայտարարել քարոզարշավային մի շարք միջոցառումներ։
«Բժիշկների խորհրդով այսօր կհանգստանամ տանը»,- չորեքշաբթի գրել է նա Twitter-ում։ Էրդողանը հայտնել է, որ իր փոխարեն այսօր նախատեսված նախընտրական հանրահավաքներին Քըրըքալեում, Սիվասում և Յոզգաթում կմասնակցի Թուրքիայի փոխնախագահ Ֆուաթ Օքթայը։ «Հուսով ենք մենք վաղը կշարունակենք մեր աշխատանքը»,- հավելել է Թուրքիայի նախագահը։ Բացի այդ, ըստ մամուլի հրապարակումների, չեղարկվել է Էրդողանի հարցազրույցը, որը նա պետք է տար ապրիլի 27-ին թուրքական չորս հեռուստաալիքների։
Հիշեցնենք, որ ապրիլի 25-ի երեկոյան Էրդողանն իրեն վատ է զգացել տեղական հեռուստաալիքներից մեկին տված հարցազրույցի ժամանակ, որը հեռարձակվել է ուղիղ եթերում։ Հեռարձակումն ընդհատվել է, իսկ վերսկսվելուց հետո նախագահը ներողություն է խնդրել հեուստադիտողներից՝ միջադեպը բացատրելով «ստամոքսային գրիպով» և նախընտրական քարոզարշավի պատճառով ծանրաբեռնվածությամբ։ Այնուհետև մի շարք լրատվամիջոցներ հայտնել են, որ Էրդողանն, իբր, սրտամկանի ինֆարկտ է ստացել և հոսպիտալացվել։
Հիշեցնենք, որ մայիսի 14-ին Թուրքիայում տեղի կունենան նախագահական և խորհրդարանական ընտրություններ։ 69-ամյա Էրդողանը մտադիր է առաջադրվել և ևս մեկ ժամկետով վերընտրվել որպես Թուրքիայի նախագահ։ Նրա մրցակիցն է ընդդիմադիր Ժողովրդական դաշինքի թեկնածու, Ժողովրդահանրապետական կուսակցության առաջնորդ 74-ամյա Քեմալ Քըլըչդարօղլուն։
Տաթև Ֆռանգյան
