05.11.2024 | 09:40
Բյուջե-2025-ի նախագծի քննարկումները ԱԺ հանձնաժողովներում՝ ՈՒՂԻՂ
Մոլդովայի իշխանություններն արգելել են Թաթարստանի ղեկավարի մուտքը
Քաղաքականություն
18.04.2023 | 13:19
Մոլդովայի իշխանությունները Թաթարստանի ղեկավար Ռուստամ Միննիխանովին երկրում «անցանկալի անձ» են հայտարարել և արգելել մուտքը հանրապետություն, հայտնում է Mash Telegram ալիքը։
Ըստ այդ տեղեկությունների՝ Միննիխանովը ծրագրել էր թռչել մոլդովական Գագաուզիա՝ մասնակցելու «Ժողովուրդների բարեկամություն – 2023» ժողովրդական դիվանագիտության միջազգային կոնգրեսին։ Մոլդովայում քաղաքական գործչին ուղեկցող «Ակ-Բարս» հոլդինգի ղեկավար Իվան Եգորովը նույնպես «անցանկալի անձ» է ճանաչվել, օդանավը, որում գտնվել է Թաթարստանի ղեկավարը, Քիշնևից վերադարձել է Ռուսաստան, գրում է ալիքը։
Մինչդեռ «Ինտերֆաքս» գործակալությունը մեջբերում է Մոլդովայի սահմանային ոստիկանության մամուլի քարտուղար Ռաիսա Նովիցկիի խոսքերն այն մասին, որ «Թաթարստանի պատվիրակության ժամանումը համաձայնեցված չի եղել Մոլդովայի իշխանությունների հետ, իսկ Գագաուզի ինքնավարության վարչակազմը չի նախատեսում անցկացնել միջազգային ֆորում»։
Ներկայումս Գագաուզիայում նախընտրական քարոզարշավ է ընթանում՝ ինքնավարության նոր ղեկավար ընտրելու համար։ Ընտրությունները նշանակված են ապրիլի 30-ին։ Դրանց մասնակցում է 8 թեկնածու։ Նրանցից յուրաքանչյուրը փորձում է ստանալ ռուս քաղաքական գործիչների աջակցությունը, քանի որ Գագաուզիան կողմ է Ռուսաստանի հետ մերձեցմանը, հիշեցնում է «Ինտերֆաքս»-ը։
Տաթև Ֆռանգյան
