Պուտինն այցելել է Խերսոնի և Լուգանսկի շրջանների գրավված տարածքներ

Կրեմլից հաղորդում են, որ ՌԴ նախագահ Վլադիմիր Պուտինն այցելել է Ուկրաինայի մասամբ օկուպացված երկու շրջաններ՝ Խերսոնի և Լուգանսկի մարզեր։ Թե երբ է տեղի ունեցել այցը՝ չի նշվում, գրում է BBC-ի ռուսական ծառայությունը։

Տեսանյութում, որը նկարահանված է ցերեկային ժամի, Պուտինը դուրս է գալիս Մի-8 ուղղաթիռից, այնուհետև ավտոշարասյունը մտնում է Խերսոնի շրջանի օկուպացված հատվածի կենտրոն դարձած Գենիչեսկ քաղաքը։ Երբ Պուտինը իջնում ​​է ամենագնացից, նրան դիմավորում է Դնեպրի խմբավորման հրամանատար Օլեգ Մակարևիչը։ Նա անմիջապես հայտնում է, որ իր խումբը «հրամանին համապատասխան պաշտպանական դիրք է զբաղեցրել»։ Բացի գեներալ-գնդապետ Մակարևիչից  հաղորդագրության մեջ հիշատակվում է օդադեսանտային ուժերի հրամանատար, գեներալ-գնդապետ Միխայիլ Տեպլինսկին։ Նախօրեին ամերիկյան ռազմական փորձագետները և բրիտանական հետախուզությունը հայտնել էին, որ Տեպլինսկին հունվարին ենթադրյալ հեռացումից հետո (ըստ որոշ տեղեկությունների՝ Դոնեցկի մարզում Բախմուտի դեմ հարձակումն ուժեղացնելու համար) վերադարձել էր ռազմաճակատ։

Մեկ այլ տեսանյութում երևում է գեներալ-գնդապետ Ալեքսանդր Լապինը, որի ռազմաճակատից հեռացման և ցամաքային զորքերի գլխավոր շտաբի պետ նշանակելու մասին հաղորդվել էր հունվարին։ Ուկրաինայի իշխանությունները դեռ չեն մեկնաբանել Պուտինի՝ օկուպացված տարածքներ կատարած այցը։

Պատերազմի սկզբից ի վեր սա Պուտինի առաջին ուղևորությունն է Խերսոնի և Լուգանսկի շրջաններ։ Մինչ այդ՝ մարտի 19-ին, գիշերով, խիստ գաղտնիության պայմաններում նա այցելել էր անցյալ տարվա մայիսին Ռուսաստանի կողմից գրավված Մարիուպոլ քաղաք։