24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
ՆԱՏՕ-ին Ֆինլանդիայի անդամակցությունը ՌԴ-ին կստիպի հակաքայլեր ձեռնարկել․ Պեսկով
Քաղաքականություն
04.04.2023 | 15:36
Ռուսաստանը ստիպված կլինի հակաքայլեր ձեռնարկել ՆԱՏՕ-ին Ֆինլանդիայի անդամակցելու հետ կապված։ Այս մասին լրագրողներին ասել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ-ը։
«Կրեմլում կարծում են, որ դա իրավիճակի հերթական սրումն է, որ ՆԱՏՕ-ի ընդլայնումը ոտնձգություն է Ռուսաստանի Դաշնության անվտանգության, մեր շահերի դեմ։ Մենք դա այդպես ենք ընկալում։ Մենք հակաքայլեր ենք ձեռնարկելու՝ ապահովելու մեր անվտանգությունը տակտիկական ու ռազմավարական առումով»,- ասել է Պեսկովը՝ նշելով, որ հակաքայլերն այնպիսին կլինեն, որոնք Ռուսաստանի Դաշնությունն «անհրաժեշտ կհամարի»։
Նրա խոսքով՝ ռուս զինվորականները ժամանակին կհայտնեն Ֆինլանդիայում ՆԱՏՕ-ի գործողությունների պատասխանի մասին։
«Հավատացեք, մեր զինվորականները մեզ ժամանակին կտեղեկացնեն ամեն ինչի մասին»,- ասել է Պեսկովը՝ պատասխանելով ռուսական սահմանների մոտ ՆԱՏՕ-ի ենթակառուցվածքների հնարավոր տեղակայմանը Ռուսաստանի արձագանքի մասին հարցին։
«Ուշադիր հետևելու ենք, թե ինչ է տեղի ունենալու Ֆինլանդիայում, ինչպես է Հյուսիսատլանտյան դաշինքը շահագործելու Ֆինլանդիայի տարածքները՝ այնտեղ զենք, համակարգեր, ենթակառուցվածքներ տեղադրելու առումով, որոնք մոտ կլինեն մեր սահմաններին և կարող են սպառնալ մեզ: Կախված դրանից՝ միջոցներ կձեռնարկվեն»,- հավելել է ՌԴ նախագահի մամուլի խոսնակը։
Ըստ Պեսկովի՝ Ռուսաստանի նկատմամբ թշնամաբար տրամադրված ՆԱՏՕ-ին երկրների անդամակցումը կազդի երկկողմ հարաբերությունների վրա։
«Իհարկե, դա չի կարող չազդել դաշինքի նոր անդամ դարձած երկրների հետ երկկողմ հարաբերությունների բնույթի վրա»,- ասել է Դմիտրի Պեսկովը։
Հավելենք, որ ՆԱՏՕ-ի գլխավոր քարտուղար Յենս Ստոլտենբերգը նախօրեին հայտարարել էր, որ Ֆինլանդիան այսօր՝ ապրիլի 4-ին պաշտոնապես դառնալու է ՆԱՏՕ-ի անդամ։
Էմմա Չոբանյան
