17.05.2026 | 12:40
ՄԻՊ-ը խիստ մտահոգիչ է համարում «Նուբարաշենի» հոգեբուժարանում արձանագրված ինքնասպանության դեպքը
ՄԱԿ-ը Հաագայի դատարանին խնդրել է պարզաբանել երկրների կլիմայական պարտավորությունները
Քաղաքականություն
30.03.2023 | 21:59
ՄԱԿ-ի Գլխավոր վեհաժողովը Հաագայի Արդարադատության միջազգային դատարանին խնդրել է խորհրդատվական եզրակացություն տրամադրել կլիմայի փոփոխության համար երկրների պատասխանատվության վերաբերյալ, ինչպես նաև պարզաբանել կլիմայական համակարգը ջերմոցային գազերի արտանետումներից պաշտպանելու նրանց պարտավորությունները: Խաղաղօվկիանոսյան Վանուատու կղզի պետության նախաձեռնած համապատասխան բանաձևը միաձայն ընդունվել է, փոխանցում է DW-ի ռուսական ծառայությունը։
Ելույթ ունենալով Գլխավոր վեհաժողովի նիստում, որի ընթացքում ընդունվել է բանաձևը, ՄԱԿ-ի գլխավոր քարտուղար Անտոնիո Գուտերեշը նշել է, որ Արդարադատության միջազգային դատարանի խորհրդատվական եզրակացությունները մեծ նշանակություն ունեն։
«Նման եզրակացությունը կօգնի Գլխավոր վեհաժողովին, ՄԱԿ-ին և անդամ երկրներին՝ ավելի համարձակ և վճռական գործողություններ ձեռնարկել կլիմայի փոփոխության դեմ պայքարելու համար, որի կարիքը մեր աշխարհն այդքան ունի»,- ասել է նա:
Ակնկալվում է, որ դատարանից մոտ երկու տարի կպահանջվի խորհրդատվական եզրակացություն տալու համար: Այդ եզրակացությունը պարտադիր չի լինի որևէ իրավասության համար, բայց կարող է հիմք հանդիսանալ կլիմայի վերաբերյալ ապագա բանակցությունների համար:
Տաթև Ֆռանգյան
