«Ինչպես հերոսը ձեռք բերեց իշխանություն և փող»․ Թևան Պողոսյան․ ՏԵՍԱՆՅՈՒԹ

Ազգային ժողովի պատգամավոր, «Երկրապահ» կամավորական միության ղեկավար  Մանվել Գրիգորյանին պատկանող սեփականություններում ԱԱԾ-ի կողմից իրականացված խուզարկություններն ու դրանց արդյունքում կատարված սկանդալային բացահայտումները ցույց տվեցին, որ բանակի նկատմամբ պետական վերահսկողությունը պատշաճ մակարդակի վրա չէ, և այս հարցում կան լուրջ բացթողումներ ու թերացումներ, ինչի շուրջ այսօր կազմակերպված «Կոռուպցիան բանակում. ովքե՞ր և ինչպե՞ս պետք է կիսեն Մանվել Գրիգորյանի հետ պատասխանատվությունը» թեմայով 
 քննարկման ժամանակ խոսեց Մարդկային զարգացման միջազգային կենտրոնի գործադիր տնօրեն Թևան Պողոսյանը։

Վերջինիս խոսքով՝ բանակում կոռուպցիայից ազատվելու համար առաջին հերթին պետք է ձևավորել ճիշտ արժեքային համակարգ սրբությունների մեջ: «Սրբությունը, միգուցե, բանակը չէ, միգուցե անվտանգությունն է։ Մինչև ցանկացած մարդ որոշում կայացնելիս չնստի և նայի, թե իր որոշմամբ անվտանգությունից ինչ է տանելու, թաքցնելու,  և այդ կարմիր գիծը չանցնի, մենք կունենանք այսպիսի երևույթներ»,- ասաց Թևան Պողոսյանը։ 

Նա բերեց Իսրայելի օրինակը, որտեղ կարմիր գիծը երբեք չեն անցնում և բանակին  հատկացված լումային երբեք չեն կպնում։ 

Թևան Պողոսյանի խոսքով՝ բանակին տրված ցանկացած լումայի վերահսկողության համար հստակ մեխանիզմներ են պետք, իսկ քանի դեռ դրանք չկան, անպայման կգտնվեն մարդիկ, ովքեր այդ գումարները կօգտագործեն այլ նպատակներով։

«Պետք է հասկանալ՝ ինչպես կատարվեց, որ հերոսը փառքի գայթակղությունից ձեռք բերեց իշխանութուն և փող»,- ասաց նա։  

Մանրամասները՝ տեսանյութում։