Քաղաքականություն
12.03.2023 | 19:12
Մոտ կես միլիոն մարդ դուրս է եկել Իսրայելի փողոցներ՝ բողոքելու կառավարության կողմից դատական համակարգի բարեփոխման դեմ։ BBC-ի ռուսական ծառայության փոխանցմամբ՝ սա երկրի պատմության մեջ ամենազանգվածային բողոքի ակցիան է։ Միայն Թել Ավիվում ակցիային մասնակցել է մոտ 200 հազար իսրայելցի։
Երկրում բողոքի ակցիաները չեն հանդարտվում ավելի քան երկու ամիս։ Դրանց մասնակիցները հայտարարում են, որ դուրս են գալիս պաշտպանելու ժողովրդավարությունը, որը ոտնձգության է ենթարկվել Բենիամին Նեթանյահուի նոր կառավարության կողմից։ Վարչապետն իր հերթին պնդում է, որ դատարանների լիազորությունները սահմանափակող բարեփոխումը կվերականգնի իշխանության թևերի միջև հավասարակշռությունը։
Բարեփոխման էությունը դատական իշխանությանը օրենսդիր և գործադիր ատյանների որոշումների վրա ազդելու հնարավորությունից զրկելն է։ Մինչ այժմ Գերագույն դատարանը կարող էր արգելափակել այն օրենքների ընդունումը, որոնք հակասահմանադրական էր համարում: Առաջարկվող փոփոխությունները նշանակում են, որ ցանկացած վետոն կարող է չեղարկվել խորհրդարանական պարզ մեծամասնությամբ՝ 61 ձայնով:
Այլ կերպ ասած՝ իշխող կոալիցիան, որը պարզապես մեծամասնություն ունի Կնեսետում, միշտ կկարողանա շրջանցել Գերագույն դատարանի վետոն, ազատորեն ընդունել կամ չեղարկել ցանկացած օրենք։ Կառավարությունը մինչ այժմ ցույց չի տվել, որ պատրաստ է երկխոսել ցուցարարների հետ:
Իշխանությունը պնդում է, որ դատական համակարգի սահմանափակումը ժողովրդի կամքն է և բոլոր ոլորտներում հետագա առաջընթացի անհրաժեշտություն։
Բարեփոխումների կողմնակիցները պնդում են, որ Գերագույն դատարանի ձեռքում վերջին տարիներին կենտրոնացել է բացարձակ իշխանությունը, և ժողովրդի կողմից ընտրված կառավարությունը չի կարող արդյունավետ աշխատել, քանի որ ստիպված է անընդհատ հաղթահարել դատավորների դիմադրությունը։
Մինչ այժմ իշխանությունները հայտարարել են, որ իսրայելական քաղաքների փողոցներում բողոքի ակցիաները կազմակերպվում են ընդդիմության կողմից՝ հանուն երկրում ընդհանուր ապակայունացման, իսկ բարեփոխումն օգտագործվում է միայն որպես պատրվակ։
