Դուք մեզ քննադատեք, և մենք կլավացնենք բիզնես միջավայրը. Վահան Քերոբյանը` գործարարներին. ՏԵՍԱՆՅՈՒԹ

Այսօր Գյումրիում կառավարության մի քանի ներկայացուցիչների՝ ՀՀ էկոնոմիկայի նախարար Վահան Քերոբյանի, էկոնոմիկայի փոխնախարար Արման Խոջոյանի, Ֆինանսների նախարար Վահե Հովհաննիսյանի, Պետական եկամուտների կոմիտեի նախարար Ռուստամ Բադասյանի, Ազգային ժողովի տնտեսական հարցերի մշտական հանձնաժողովի նախագահ Բաբկեն Թունյանի մասնակցությամբ տեղի ունեցավ «Պետություն-մասնավոր երկխոսություն» խորագիրը կրող բիզնես ֆորում։

Այս ֆորմատը կիրառվում է առաջին անգամ, նպատակն այն է, որ գործարարները դեմ առ դեմ հանդիպեն կառավարության ներկայացուցիչների հետ և բարձրաձայնեն իրենց հուզող խնդիրները։

Բիզենս ֆորումի նախաձեռնողը Գյումրու նախկին փոխքաղաքապետ, այժմ ԱԺ պատգամավոր Դավիթ Առուշանյանն էր։ Նա ասաց, որ Գյումրու փոխքաղաքապետի պաշտոնը զբաղեցնելու ժամանակ իրեն հաճախակի են դիմել գործարարները՝ իրենց մտահոգությունները, խնդիրներն ու առաջարկները ներկայացնելով։

«Նման հանդիպում կազմակերպելու նախապատմությունն ասեմ․ գաղափար ծագեց իմ մոտ, որպեսզի համապատասխան գերատեսչությունները լինեն մի տեղում, Շիրակի մարզի տնտեսվարողները կարողանան հարցերին լուծում տալ։

Սովետական Միության ժամանակ Գյումրին արդյունաբերական քաղաք է համարվել, և հիմա ունենք շատ գործարարներ, որոնք նորից շարունակում են այդ գործը և համոզված եմ, վստահ եմ, որ ամենալավ ներդրողը մարզում գործող գործարարներն են, որոնք ահռելի աշխատանք են արել, բարդ ժամանակահատված են անցել, մինչև կայացել է իրենց բիզնեսը»,- ասաց պատգամավորը։

Նա նաև որոշ թվեր հրապարակեց՝ նշելով, որ Գյումրին ներկայացնող 18 ընկերություններ բյուջե են վճարել 10 միլիարդ դրամից ավելի հարկեր։

Էկոմոնիկայի նախարար Վահան Քերոբյանն էլ  ասաց․ «Պարզ է, որ շատ են խոչընդոտները, շատ են խնդիրները, որոնք խանգարում են բիզնեսմեններին, մեզ համար կարևոր է առաջին ձեռքից լսել այն պրոբլեմները, որոնց բախվում է բիզենսը։
Քննադատեք մեզ, ինչքան հարկ եք համարում, մենք էլ այդ քննադատությունը կվերածենք բիզնեսի միջավայրի լավացման օրակարգի»։

Արմիկ Մովսիսյան