14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Պուտինի ուղերձին լապշան ականջներից կախ հետևած պատգամավորին կդատեն
Քաղաքականություն
03.03.2023 | 22:57
ՌԴ Կոմունիստական կուսակցությունից Սամարայի շրջանային Դումայի պատգամավոր Միխայիլ Աբդալկինի նկատմամբ, որը համացանցում տեսանյութ էր տեղադրել, որտեղ լապշան ականջներից կախ դիտում է ՌԴ նախագահ Վլադիմիր Պուտինի ուղերձը Դաշնային ժողովին, վարչական արձանագրություն է կազմվել բանակը վարկաբեկելու հոդվածով։ Գործով նյութերը դատարանը ստացել է մարտի 2-ին, դատական նիստը կկայանա մարտի 7-ին, գրում է DW-ի ռուսական ծառայությունը։
Մարտի 2-ին Միխայիլ Աբդալկինը «ВКонтакте» սոցիալական ցանցի իր էջում հայտարարել է, որ գործը բացվել է «հենց տեսանյութի համար»։
«Մենք պայքարելու ենք, ապացուցելու ենք մեր անմեղությունը»,- հավելել է նա։
Պատգամավորն ինքն է տեսանյութը հրապարակել սոցցանցերի իր անձնական էջերում՝ նշելով, որ Պուտինի ուղերձը դիտել է շրջանային Դումայում Կոմունիստական կուսակցության խմբակցության ղեկավարության խնդրանքով։
«Ես լիովին աջակցում եմ, լիովին համաձայն եմ, հիանալի ելույթ էր: Վերջին 23 տարվա ընթացքում ես նման բան չէի լսել: Հաճելիորեն զարմացած եմ»,- մեկնաբանել է Աբդալկինը տեսանյութը:
Ավելի վաղ Սամարայի շրջանային Դուման Միխայիլ Աբդալկինի նկատմամբ «հրապարակային պարսավանք» էր հրապարակել։ Պատգամավորներն առաջարկել են նրան հեռացնել կուսակցությունից, ինչպես նաև խնդրել են իրավապահ մարմիններին ու դատախազությանը իրավական գնահատական տալ նրա արարքին։ Մարտի 1-ին Աբդալկինը հրավիրվել է ոստիկանություն։
Տաթև Ֆռանգյան
