ՄԱԿ-ը բանաձև է ընդունել, որով կոչ է անում ՌԴ-ին զորքերը դուրս բերել Ուկրաինայից և դադարեցնել պատերազմը․ ինչպես է ՀՀ-ն քվեարկել

ՄԱԿ-ի Գլխավոր վեհաժողովն արտահերթ նիստում բանաձև է ընդունել, որով կոչ է անում Ռուսաստանին դադարեցնել ռազմական գործողությունները և դուրս բերել զորքերը Ուկրաինայից, գրում է BBC-ի ռուսական ծառայությունը։

Բանաձևին կողմ է քվեարկել ՄԱԿ-ի 193 անդամ երկրներից 141-ը, այսինքն՝ հիմնական միջազգային կազմակերպության անդամների գրեթե երեք քառորդը (73%), դեմ՝ 7, ձեռնպահ՝ 32 երկիր։

Բանաձևին դեմ (այսինքն՝ «Ռուսաստանի կողմ») քվեարկել է վեց երկիր։ Սա մի փոքր ավելին է, քան նախորդ տարվա նույն բանաձևերի երկու քվեարկությունները՝ մարտի 3-ին և հոկտեմբերի 12-ին (դեմ քվեարկած երկրները չորսն էին): Նշենք, որ անցյալ տարի Ռուսաստանի դաշնակիցների շարքերում, բացի անփոփոխ Բելառուսից, Սիրիայից և Հյուսիսային Կորեայից, հանդես են եկել Էրիթրեան և Նիկարագուան։ Իսկ այժմ նրանց շարքերը համալրել է Մալին, որտեղ տեղի խունտայի համար կռվում են «Վագների» մարտիկները։

Ինչ վերաբերում է Ռուսաստանի պաշտոնական դաշնակիցներին՝ ՀԱՊԿ-ի ու ԵՏՄ-ի երկրներին, ապա, ըստ քվեարկության արդյունքների, միայն Մինսկն է դեռևս աջակցում Մոսկվային պատերազմի հարցում։ Հայաստանը, Ղազախստանը, Տաջիկստանը և Ղրղզստանը կրկին ձեռնպահ են մնացել՝ ինչպես նախորդ քվեարկություններում։

Ընդհանուր առմամբ, ձեռնպահ է մնացել 32 երկիր, այդ թվում՝ Չինաստանը, Հնդկաստանը և Իրանը։

13 երկրներ ընդհանրապես չեն քվեարկել, քաղաքական մեկնաբանների գնահատմամբ՝ «գնացել են ռազմավարական սուրճի ընդմիջման»: Դրանց թվում են Ադրբեջանը, Թուրքմենստանը և Վենեսուելան։

Բանաձևին կողմ քվեարկած երկրների թվում, ինչպես նախկինում, կրկին Սերբիան է, որն ավանդաբար համարվում է Ռուսաստանին բարեկամ երկիր։ Վրաստանը ևս կողմ է քվեարկել բանաձևին։

Հիշեցնենք, որ ՄԱԿ-ի գլխավոր քարտուղար Անտոնիո Գուտերեշն ավելի վաղ դատապարտել էր Ռուսաստանի ներխուժումն Ուկրաինա՝ այն անվանելով վիրավորանք աշխարհի հավաքական խղճի համար։

Տաթև Ֆռանգյան